Bu gün Bakı Ağır Cinayətlər Məhkəməsində Qaraçuxur qəsəbəsindəki məscidə partlayıcı vasitə atmaqda təqsirləndirilən Namiq Nəsibov və Elnur Ələkbərovun cinayət işi üzrə məhkəmə prosesi davam etdirilib.

Virtualaz.org saytının əldə etdiyi xəbərə görə, prosesə hakim Rauf Əliyev sədrlik edib.

Prosesdə zərərçəkmiş şəxs qismində Samir Yusubov dindirilib. O, ifadəsində taksi sürücüsü işlədiyini, hadisə baş verən gecə yolda iki nəfərin onu əl edib saxlatdığını göstərib: “Mənə dedilər ki, məscidin qabağında işimiz var, gözləyərsən. Cavan tayı mənimlə oturdu, nisbətən yaşlı olanı (Namiq Nəsibovu nəzərdə tutur-red.) məscidə getdi. Bir müddətdən sonra səs-küy qalxdı. Mən maşında əyləşən gəncə, adını sonradan bildiyim Elnura dedim ki, gedək görək nə məsələdir. Elnur imkan vermədi. Amma sonra düşdüm, vəziyyəti belə görüb istədim minib maşına oradan gedim. Bu vaxt Elnurla Namiq qaça-qaça gəlib maşın aəyləşdilər. Namiq bıçağı belimə dirədi ki, tez ol, sür. Onlardan şübhələnsəm də səsimi çıxarmadım. Hər ikisini “Koroğlu” metrosunun yaxınlığında düşürdüm. Hadisə barədə polisə müraciət etdim. Mənə maşınımın axtarışda olduğunu, apardığım adamların məscidi yandırdığını dedilər. Səhərə kimi polis bölməsində qalmışam”.

Zərərçəkmiş şəxs qismində Qafqaz Müsəlmanlar İdarəsi hüquq şöbəsinin əməkdaşı Əlişa Əliyev də ifadə verib. O, ifadəsində hadisə zamanı namaz otağının yandırıldığı, ümumi olaraq məsciddə 9187 manat ziyan vurulduğunu deyib: “Vurulan ziyanı biz ödədik. Şeyxin əmri ilə tez bir zamanda yenidənqurma işlərini başa çatdırdıq. İlk olaraq məhkəmədən bizə dəyən maddi ziyanının ödənilməsini istəyirik”.

Təqsirləndirilən şəxs qismində dindirilən Namiq Nəsibov ifadəsində psixoloji problemlərinin olduğunu göstərib: “Elnuru 2014-cü ildən tanıyıram, dostuq. Mən özüm həkiməm. Psixoloji problemlərimlə əlaqədar olaraq hər fəsil dərman qəbul edirəm. Hadisə günü dostlarla görüşmüşdük. Bilirsiniz, biz Azərbaycan kürdləri olaraq həmişə görüşüb söhbətlər aparırdıq. ümumi olaraq bizim uşaqlarda mən də, kürd kimliyimizlə fəxr edirik. O cümlədən kürd əsilli olaraq Azərbaycan vətəndaşı olaraq da fəxr edirik.

Son zamanlar Suriya və onun kənardakı hadisələr bizə pis təsir edirdi, qəbul edə bilmirdik. Hadisə baş verən gün Elnur mənə dedi ki, Hövsanda işim var, dostlarımız bizi gözləyir. Mən də getdim. Məclisdə oturub spirtli içki içdik, sonra mən psixoloji problemlərimə görə dərman qəbul etdim. çölə çıxıb, siqaret çəkdik. Ondan sonra nələr baş verdiyini hələ də yadıma sala bilmirəm. özümə gələndə şəhərdə idim. Sonra bizi tutub Milli Təhlükəsizlik Nazirliyinə gətirdilər. İfadə alan zaman heç nəyi xatırlamadığımı, bunun da səbəbinin dərmanlar olduğu bildirdim. İstintaq zamanı ifadələri təzyiq altında vermişəm. Onu da deyim ki, sonra kameralara baxdım. Bildim ki, məscidi yandırmışam. Psixoli problemlərim olmasaydı, təsir altında olmasaydım, mən bu hərəkəti edəcək adam deyildim. Heç zaman xəyalıma belə gətirməzdim ki, mən belə bir əməl tutum”.

Təqsirləndirilən şəxs daha sonra Suriyaya öz hesabına gedərək orada tibbi yardım göstərdiyini deyib.

Məhkəmə prosesi iyulun 13-də davam edəcək.

Qeyd edək ki, ötən il noyabrın 26-da Qaraçuxur qəsəbəsində yerləşən “Cümə” məscidinə yandırıcı maye ilə doldurulmuş şüşə butulkalar atılaraq yanğın törədilib. Milli Təhlükəsizlik Nazirliyi tərəfindən keçirilmiş tədbirlər nəticəsində hadisəni törətməkdə şübhəli bilinən Nəsibov Namiq və Ələkbərov Elnur saxlanılıblar. Onlar barəsində Cinayət Məcəlləsinin 214.2.1-ci (terrorçuluq), 228.2.1-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə cinayət işi başlanıb. Müəyyən edilib ki, Namiq Nəsibov 2014-cü ilin avqust-sentyabr aylarında PKK terrorçu təşkilatının nəzarətində olan Suriya Ərəb Respublikasının ərazilərinə gedərək oradakı döyüşlərdə iştirak edib. Namiq Nəsibov Suriyanın Kobani şəhərindən qayıtdıqdan sonra Elnur Ələkbərov ilə birgə PKK terrorçu təşkilatının respublikamızda qanadı olaraq qeyri-rəsmi “Yekbun” təşkilatını yaradıb və ətraflarına tərəfdarlar toplamaq işinə başlayıblar. Namiq Nəsibov və Elnur Ələkbərov İnternetdə sosial şəbəkələr vasitəsi ilə yaratdıqları təşkilatın adından Bakı şəhərində aksiyaların keçirilməsi üçün çağırışlar da edib.