"“Yeni Azərbaycan” Partiyasının mətbuat xidməti dəfələrlə bu barədə məlumat verib və bir daha təkrar etməyə lüzum görür ki, keçmiş deputat Maksim Musayevin YAP-ın yaradılmasında heç bir iştirakı olmayıb”.

Strateq.az xəbər verir ki, bu sözləri YAP-ın mətbuat xidmətinin rəhbəri Hüseyn Paşayev musavat.com-a açıqlamasında deyib.

O, əlavə edib ki, M.Musayevin məşhur “91-lər”in siyahısına heç bir aidiyyatı yoxdur: “Xahiş edirik ki, Maksim Musayev nə mətbuatda, nə ictimai yerlərdə, ümumiyyətlə, heç bir ünvanda özünü “Yeni Azərbaycan” Partiyasının qurulmasında iştirak etmiş “91-lər”in nümayəndəsi kimi təqdim etməsin və bununla bağlı KİV-lərdə çaşqınlıq yaratmasın”. 

H.Paşayev M.Musayevin “YAP-ın qurucularından biri” kimi təqdimatı ilə də razılaşmayıb: “Onlar özlərini belə təqdim edirlər. YAP 1992-ci ildə yaranıb, mən də həmin ildən bu partiyadayam. Son vaxtlar özlərini “91-lərin üzvü”, “YAP-ın qurucusu” kimi təqdim edən insanların əksəriyyətini mən tanımıram, yaxud da sonradan tanımışam. O cümlədən də Eldar Sabiroğlunu…”.

Mətbuat xidmətinin rəhbəri M.Musayevin YAP-ın üzvü olduğunu təsdiqləyib: “Ancaq YAP qarşısında xidmətlərini şişirtməklə məşğuldur. Bu isə onu tanıyanlar arasında müsbət rəy formalaşdırmır”. 

H.Paşayev M.Musayevlə Xızı rayon İcra Hakimiyyətinin başçısı Xəzər Aslanov arasında baş verən konfliktli vəziyyətə partiyanın müdaxilə etməyəcəyini də söyləyib: “YAP fərdlər arasında münasibətlərə qarışmır”. 

Qeyd edək ki, Xızının sabiq icra başçısı M.Musayev Altıağacda ona məxsus tikilinin hazırkı icra başçısı Xəzər Aslanovun göstərişi ilə söküldüyünü deyib və əlavə edib ki, başçı ondan rüşvət istəyir…