XƏBƏR LENTİ

10 Mart 2021

Digər Xəbərlər

01 Mart 2017 - 17:39

Zərərçəkən: “Çovdarovda ləyaqət olsa, bizim üzümüzə baxa bilməz” –Məhkəmədə qalmaqal

covdarov

 Bu gün Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə iclası davam etdirilib.

Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesdə şahid qismində zərərçəkmiş Nəsib Əliyevin bacanağı Elçin Xudiyev ifadə verib.

O, N.Əliyevə 100 min manat borc pul verdiyini söyləyib: "Həmin pulun 50 min manatını Nəsib Əliyevin oğlu Elton Əliyev MTN-də saxlanılmazdan əvvəl vermişəm. Onun da bu məsələyə adiyyatı yoxdur".

A.Çovdarovun vəkili Sadiq Rəsulov iclasdan sonra jurnalistlərə açıqlamasında bildirib ki, N.Əliyev istindaqdadkı ifadəsində göstərib ki, oğlu Elton Əliyev MTN-də saxlanılan günün səhəri pulu nazirliyin inzibati binasında verib: "Elçin Xudiyev isə məhkəmədə dindirilən zaman bildirib ki, 50 min manatı Nəsib Əliyevə Elton Əliyev saxlanılandan bir neçə gün sonra verib. Elçin istintaq zamanı ifadəsində söyləyib ki, Nəsib Əliyev ona pulu Akif Çovdarova verəcəyini bildirib. Bundan sonra məhkəmə iclasında ona Elçin Xudiyevə suallar ünvanladıq. Elçin isə Nəsib Əliyevin pulu kimə verməsindən xəbərsiz olduğunu dedi. O, hətta Akif Çovdarovu tanımadığını qeyd etdi".

S.Rəsulov E.Xudiyev istintaq zamanı ifadəsini oxumadan imzaladığını söyləyib.

Prosesdən sonra zərərçəkmiş Nadir Feyziyev jurnalistlərə açıqlama verib. O, məhkəmədə sualları cavablandırdığını bildirib. Onun sözlərinə görə, Cahangir Alışovdan 350 min manat pul alıb, MTN-də Alı Nəbiyevə verib: "Bunu da məhkəmədə təsdiq etdim".

Digər zərərçəkmiş C.Alışov isə jurnalistlərə açıqlamasında bildirib ki, məhkəmə iclasında A.Çovdarov zərərçəkmiş şəxsləri dələduz adlandırıb: "O, bizim dələduz olduğumuzu dedi. Akif Çovdarovun ləyaqəti olsa, başını qaldırıb adamların üzünə baxa bilməzdi".

Günün ikinci yarısında davam etdirilən prosesdə zərərçəkmiş Arif Həsənov dindirilib. O, ifadəsi zamanı təqsirləndirilən A.Əliyevə 100 min dollar və 100 min manat verdiyini deyib.

A.Çovdarovun vəkili Kamandar Nəsibov jurnalistlərə açıqlamasında bildirib ki, daha sonra A.Həsənov təqsirləndirilən şəxslərin müdafiəçilərinin suallarını cavablandırıb: "Ona sual verdik ki, həmin pulları nə üçün Akif Əliyevə vermisən. O isə Akif Əliyev pul istədiyi üçün ona həmin məbləğləri verdiyini bildirib".

K.Nəsibov söyləyib ki, A.Həsənovun epizodu üzrə bir neçə zərərçəkmiş şikayətlərindən imtina edib: "Həmin zərərçəkmişlər heç bir təziqə məruz qalmadıqlarını dedilər".

Məhkəmənin növbəti iclası martın 7-nə təyin edilib(Report).

Qeyd edək ki, A.Çovdarov 2015-ci ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.

A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.

Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət
sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.