XƏBƏR LENTİ

10 Mart 2021

Digər Xəbərlər

07 İyul 2018 - 02:57

ABŞ səfiri Putin-Tramp görüşünə hazırlıqdan danışdı –İki dünya nəhənginin görüşündə nələr müzakirə olunacaq?

ABŞ-ın Rusiyadakı səfiri prezident Donald Trampın Rusiya lideri Vladimir Putinlə görüşmək qərarını müdafiə edib və deyib ki, Vaşinqtonla münasibətlərini yaxşılaşdırmaq Moskvanın öz işidir.

Strateq.az-ın Azadlıq Radiosuna istinadla verdiyi xəbərə görə, iyulun 5-də selektorla mətbuat konfransı keçirən Con Hantsman deyib ki, Tramp əvvəlcə Putinlə təkbətək görüşəcək, bunun ardınca hər iki tərəfdən rəsmilərin iştirakilə geniş görüş olacaq.

Başqa rəsmi və ekspertlərdən fərqli olaraq, Hantsman Moskvanın Ukraynaya qarşı təcavüzünün davam etdiyi və Rusiyanın 2016-cı il ABŞ seçkisinə müdaxiləsinin araşdırıldığı bir vaxtda Trampın Putinlə görüşməsində heç bir problem görmədiyini deyib: “Rusiyanın bizim ikitərəfli münasibətlərimizdə tərəqqi etmək istəyib-istəmədiyini bilmək bizim milli təhlükəsizlik marağımızdadır”.

İyulun 16-da Helsinkidə keçiriləcək bu sammit iki lider arasında indiyədək ən böyük görüş olmalıdır.

Səfir bunu da bildirib ki, bu görüş zamanı “Yeni START” silah müqaviləsinin və Ortamənzilli Raketlərə Dair Sazişin müddətlərinin uzadılmasının mümkünlüyü də müzakirə olunacaq. Hazırda Vaşinqton hər iki sənədin Rusiya tərəfindən dəfələrlə pozulduğunu iddia edir.

Bu görüşdə Trampın Moskvanın ABŞ seçkisinə iddia edilən müdaxiləsi barədə məsələni qaldırıb-qaldırmayacağına dair qarışıq bəyanatlar səslənib.

Tramp Moskvanın seçkiyə müdaxiləsinə dair ABŞ kəşfiyyat agentliklərinin nəticələrini şübhə altına alır.

Hantsman deyib ki, bu görüşdə Ukraynanın şərqində davam edən münaqişənin müzakirə olunacağı da gözlənilir.  ABŞ və Qərb Rusiyanın Ukraynanın Krım yarımadasını ilhaq etməsinə görə Moskva üzərinə sanksiyalar qoyub.

Tramp bu yaxınlarda ABŞ-ın siyasətini şübhə altına aldığına dair işarələr verib və deyib ki, Krımı Rusiyanın bir hissəsi kimi tanıyacağının mümkünlüyünü istisna etmir.

Tramp Helsinkiyə səfərdən əvvəl Brüsseldə NATO dövlət başçlıları ilə görüşəcək.

ABŞ prezidenti Amerika qoşunlarını Avropadan çıxara biləcəyinə dair də üstüörtülü hədələr səsləndirib.