XƏBƏR LENTİ

04 Avqust 2020

Digər Xəbərlər

31 Oktyabr 2018 - 10:47

“İran Azərbaycana şühbə ilə yanaşır” –Boltonun səfəri, Nəcməddin Sadıkovun İsrail ziyarəti Tehranı qıcıqlandırıb

“Türkiyə, Azərbaycan və İran xarici işlər nazirlərinin İstanbulda keçirdikləri görüşündə daha çox rəsmi Tehran maraqlı olub. Gələn həftədən başlayaraq, ABŞ-ın İrana qarşı sərt sanksiyaları işə düşür. Bu sanksiyalar müəyyən istisnalarla İranla əməkdaşlıq edən dövlət və şirkətlərə qarşı da tətbiq ediləcək. Ona görə də Tehran elə bugündən sanksiyaların yarılması haqqında düşünməlidir”.

Strateq.az xəbər verir ki, bu fikirləri “Atlas” Araşdırmaları Mərkəzinin rəhbəri, politoloq Elxan Şahinoğlu bildirib.

Ekspert qeyd edib ki, ABŞ-ın sanksiyaları fonunda iranlı rəsmilər beynəlxalq aləmlə mümkün qədər çox təmaslara çalışırlar: “Tehran ümid edir ki, qonşuları Azərbaycan və Türkiyə Amerikanın sanksiyalarına rəğmən, İranla əməkdaşlığı davam etdirəcəklər. İstanbuldakı görüşdə Türkiyə və Azərbaycan xarici işlər nazirləri İrana qarşı sanksiyalara qoşulmayacaqlarını və əməkdaşlığı davam etdirəcəklərini vəd etdilər. İran xarici işlər naziri isə bunun qarşılığında “Dağlıq Qarabağ münaqişəsinin həllinə maraqlıyıq” dedi. Çeynənmiş cümlədir. Deməliydi ki, “Dağlıq Qarabağ münaqişəsinin Azərbaycanın ərazi bütövlüyü çərçivəsində həllində maraqlıyıq”. Demədi”.

Elxan Şahinoğlu bu arada, İran Silahlı Qüvvələrinin Baş Qərargah rəisi, general Məhəmməd Baqirinin Azərbaycana səfərinin təxirə salınmasına diqqət çəkib: “Bunu belə izah etdilər ki, onun iş qrafikində baş vermiş dəyişikliyə görə səfər təxirə salınıb. İnandırıcı deyil. Görünür, Tehran Azərbaycanın baş qərargah rəisinin keçən həftə İsrailə səfərindən və israilli həmkarı ilə görüşündən narazı qalıb. Üstəlik, Tehran, böyük ehtimalla, ABŞ prezidentinin milli təhlükəsizlik üzrə müşaviri Con Boltonun Bakıda Azərbaycanın ünvanına dediyi isti mesajlardan da narazı qalıb. Özləri bilər”.

Politoloq vurğulayır ki, Tehrana qarşı sərt sanksiyalara rəğmən, Azərbaycan İranla əməkdaşlıqdan imtina etmir, Rəşt-Astara dəmiryolunun tikintisi üçün ayırdığı 500 milyon dollar kredit vədinə də sadiqdir: “Ancaq bunun qarşılığında Tehran yenə bizə şübhəylə yanaşır”.