XƏBƏR LENTİ

02 İyul 2020

Digər Xəbərlər

06 İyun 2020 - 18:10

Tramp 10 minə yaxın ABŞ hərbçisini Almaniyadan çıxarmaq göstərişi verdi –Onların hansı ölkəyə yerləşdiriləcəyi hələ bilinmir

ABŞ prezidenti Donald Tramp Pentaqona minlərlə Amerika əsgərinin Almaniyadan çıxarılmasını əmr edib.

Strateq.az Azadlıq Radiosuna istinadla xəbər verir ki, bu barədə iyunun 5-də “The Wall Street Journal” qəzeti yazıb.

Qəzet bildirir ki, NATO müttəfiqinin ərazisində daimi olaraq yerləşdirilmiş 34 min 500 hərbçinin 9500-ü ixtisar olunacaq.

Xəbərdə deyilir ki, bundan sonra Almaniya ərazisində ən çoxu 25 min hərbçinin saxlanması planlaşdırılır.

Almaniyanın “Der Spiegel Online” saytının verdiyi xəbərə görə isə ixtisar tədbiri 2020-ci ilin payızınadək icra olunacaq və bu ölkədəki ABŞ kontingenti 5 minlə 15 min arasında ixtisar ediləcək.

Tramp Almaniyanın NATO qarşısındakı maliyyə öhdəliklərini yerinə yetirməməsindən həmişə şikayətlənib.

Bu öhdəliyə görə, Berlin ölkə ÜDM-nin 2 faizini hərbiyə xərcləməlidir.

Lakin “Reuters” adlarının çəkilməsini istəməyən ABŞ rəsmilərinə istinadən yazır ki, Almaniyadan çıxarılan qoşunların bir hissəsi başqa müttəfiq ölkələrə göndəriləcək və ya Birləşmiş Ştatlara qayıdacaq. Həmin rəsmilər bildiriblər ki, NATO üzrə ümumi hərbi xərclərin artması ilə bağlı Almaniyada böyük kontingentin saxlanmasına ehtiyac qalmır.

Başqa bir ABŞ rəsmisinin dediyinə görə, ABŞ Birləşmiş Qərargahlar Komitəsinin rəisi, general Mark Milley artıq bir neçə aydır ki, bu dəyişikliklərin üzərində işləyir və bu proses Trampla Almaniya kansleri Angela Merkel arasındakı münasibətlərin gərginliyi ilə bağlı deyil.

2019-cu ilin sentyabrında Tramp demişdi ki, Polşa və başqa Avropa ölkələrində ABŞ hərbçiləri yerləşdiriləcək.

Bu plana görə, 1000 nəfərlik əsgəri qüvvə Polşaya göndəriləcək. Bu ölkədə rotasiyalı qaydada dəyişən 4500 ABŞ əsgəri var.

Ağ Ev və Pentaqon rəsmiləri mətbuatda yayılan bu xəbərləri şərh etməkdən boyun qaçırıblar.

Ağ Ev Milli Təhlükəsizlik Şurasının sözçüsü Con Ullyot deyib ki, Tramp xaricdəki ABŞ qüvvələrinin sayı məsələsini vaxtaşırı olaraq qiymətləndirir. Sözçü bildirib ki, ABŞ NATO üzrə ən güclü müttəfiqlərindən olan Almaniya ilə birgə müdafiə fəaliyyətini bundan sonra da davam etdirəcək.

Almaniya Xarici İşlər Nazirliyi isə xəbərlərlə bağlı heç bir şərh verməyib.