XƏBƏR LENTİ

10 Mart 2021

Digər Xəbərlər

31 Dekabr 2020 - 16:05

Milli Qəhrəmanlara verilən təqaüdün məbləği artırıldı –300 manat

Azərbaycanın Milli Qəhrəmanı adı verilmiş hər bir şəxs üçün hər ay verilən Azərbaycan Respublikası Prezidentinin təqaüdünün məbləği artırılıb.

Strateq.az xəbər verir ki, bununla bağlı Prezident İlham Əliyev müvafiq fərman imzalayıb.

Fərmana əsasən, Azərbaycanın Milli Qəhrəmanı adı verilmiş hər bir şəxs üçün ayda 1 800 manat məbləğində Azərbaycan Respublikası Prezidentinin təqaüdü veriləcək.

Fərmanla müəyyən edilib ki, Azərbaycanın Milli Qəhrəmanı adı ölümündən sonra verildikdə və ya həmin ad verilmiş şəxs sonradan vəfat etdikdə Azərbaycan Respublikası Prezidentinin təqaüdü həmin şəxslərin aşağıda göstərilən ailə üzvlərinə (təqaüd məbləği onların sayına bərabər məbləğdə bölünməklə) ödənilir:

– dul arvadına (ərinə), valideynlərinə;

– 18 yaşına çatmamış (peşə təhsili, orta ixtisas təhsili, ali təhsil müəssisələrində və Azərbaycan Milli Elmlər Akademiyasının magistratura səviyyəsində təhsil alanlara isə həmin təhsil müəssisələrini və elmi təşkilatın magistratura səviyyəsini bitirənədək, lakin ən çoxu 23 yaşına çatanadək), yaxud 18 yaşına çatanadək sağlamlıq imkanlarının məhdudluğu müəyyən olunmuş 18 yaşından yuxarı əlilliyi olan övladlarına, uşaq evlərində tərbiyə olunan qardaş və bacılarına;

– birinci növbədən digər qohumları olmayan baba və nənələrinə.

Bu Fərman 2021-ci il yanvarın 1-dən qüvvəyə minir.

Xatırladaq ki, bugünkü fərmana qədər bu məbləğ 1 500 manat olub.