XƏBƏR LENTİ

20 Oktyabr 2020
19 Oktyabr 2020

Digər Xəbərlər

07 Noyabr 2016 - 10:03

Tramp ABŞ müsəlmanlarını birləşdirdi-Rekord sayda müsəlman səs vermək üçün qeydiyyatdan keçib

abs-muselman

ABŞ-da rekord sayda – 1 milyondan çox müsəlman noyabrın 8-də keçiriləcək prezident seçkilərində səs vermək üçün qeydiyyatdan keçib.

Strateq.az Azadlıq radiosuna istinadən bildirir ki, bu, çox sayda müsəlmanın yaşadığı ştatlarda müsəlman icmasını ciddi qüvvəyə çevirir.

“Bir milyon səs” kampaniyası

ABŞ Müsəlman Təşkilatları Şurası 24 müsəlman hüquq müdafiə təşkilatını birləşdirir. "Bir milyon səs" kampaniyasını hədəf seçən bu qurum məqsədinə çatdığını açıqlayıb. Beləliklə, ABŞ-da seçici qeydiyyatından keçən müsəlmanların sayı 2012-ci illə müqayisədə 2 dəfədən çox artıb.

“Biz bir milyon həddini keçdiyimizi düşünürük. Məscidlərdə, məktəb və icma tədbirlərində icmanı seçici qeydiyyatına səfərbər etmişik. Bu yolla bu il dəyişiklik etməyə nail olmuşuq”, – deyə Şuranın baş katibi Oussama Yammal belə deyir.

Amerika İslam Münasibətləri Şurasının (CAIR) keçirdiyi sorğunun nəticəsinə görə, seçici qeydiyyatından keçmiş Amerika müsəlmanlarının 86 faizi bu il səs verməyi planlaşdırır. Yammalın sözlərinə görə, bu il müsəlmanların erkən səsvermə hallarının əvvəlki seçkilərlə müqayisədə artdığı qeydə alınıb.

“Trampun kobudluğu icmanı canlandırdı”

"Bir milyon səs" kampaniyasına ötən ilin dekabrında, respublikaçı namizəd Donald Trampın müsəlman mühacirlərin ölkəyə buraxılmaması ilə bağlı məşhur çağırışından sonra start verilib.

ABŞ müsəlmanlarının əsas hissəsi ərəblər və cənubi asiyalı mühacirlərdir. Onlar nadir hallarda vahid seçici blokunda birləşiblər. Müsəlman fəallar deyirlər ki, Trampın kobudluğu icmanı canlandıraraq, hərəkətə keçməyə sövq edib.

“Mən, adətən, namizədlərə təşəkkür etmirəm. Ancaq müsəlman icmasına heç görünməyən tərzdə enerji verdiyinə görə, Trampa təşəkkür etmək istəyirəm. Müsəlman icması təbliğatın istisini və gücünü hiss edir, həm də səs verməyin vacibliyini anlayır", – deyə CAIR-in icraçı direktoru Nihad Avad qeyd edib.

"Pew" tədqiqat mərkəzinin hesablamalarına görə, ABŞ-da ölkə əhalisinin 1 faizi civarında – 3,3 milyonadək müsəlman yaşayır. Onlardan 1,5 milyonun səsvermə hüququ var.

“İmamlara təlimat verilmişdi ki…”

Müsəlman fəallar səsverməyə daha çox müsəlmanın qatılması üçün 2 min 500-dən çox məscidin, 500 məktəbin və çox sayda icma mərkəzinin önündə qeydiyyat köşkləri qoyublar. İlboyu davam edən bu kampaniya sentyabrda – Qurban Bayramı zamanı daha da canlanıb.

“İmamlara təlimat verilmişdi ki, səs verməyin önəmi barədə moizə oxuyun", – Yammal “Amerikanın Səs”inə müsahibəsində belə deyib.

Amerika müsəlmanları 2000-ci il seçkilərində kütləvi surətdə Corc Buşa səs veriblər. Müsəlmanlar arasında Floridada Respublikaçı namizədin qələbə qazanmasında bunun mühüm rol oynadığını deyənlər var.

Ancaq o vaxtdan müsəlman icması Demokratlar Partiyasına meyllənməyə başlayıb. 2003-cü ildə ABŞ ordusunun İraqı işğal etməsini, islamofobiyanın artmasını və bir çox siyasi qərarın respublikaçılarla assosiasiya olunmasınını buna səbəb saymaq mümkündür.

CAIR-in oktyabrda keçirdiyi rəy sorğusunun nəticələrinə görə…

Seçici qeydiyyatından keçmiş müsəlmanların 72 faizi demokratların namizədi Hillari Klintona səs verməyi düşünür. Rəyi soruşulanların cəmi 4 faizi Trampa səs verəcəyini söyləyib.

"Bir milyon səs" kampaniyası bütün ölkəboyu keçirilsə də, başlıca diqqət çox sayda müsəlmanın yaşadığı "tərəddüd edən" ştatlara yönəlib. Bu ştatlarda müsəlmanların səsi yekun nəticəyə ciddi təsir göstərə bilər.

Müsəlmanların çoxu demokratların onsuz da üstün olduğu ştatlarda – Kaliforniya, Nyu -York və Nyu- Cersidə yaşayırlar.

Ancaq əsas döyüş meydanına çevrilən ştatlarda – Florida, Miçiqan, Ohayo, Pensilvaniya və Virciniyada da xeyli müsəlman əhali olsa da, onların elektoratdakı payı son dərəcə kiçikdir.