“Biz İran tərəfinin müsbət münasibətini və əməkdaşlığa hazırlığı müşahidə etdik”.

Strateq.az xəbər verir ki, bunu Küveytin xarici işlər nazirinin müavini Xalid əl-Carullah deyib. O, yanvarın 25-də Küveyt xarici işlər naziri Xalid əl-Hamid əl-Sabah və İran prezidenti Həsən Ruhani arasında danışıqların nəticələrini şərh edib.

Xatırladaq ki, küveytli nazir Fars körfəzi ölkələri Əməkdaşlıq Şurası (KƏŞ) adından H.Ruhaniyə xüsusi mesaj çatdırıb.

“İsmarış və onun məzmunu Körfəz ölkələrinin bir-birinin işlərinə qarışmamağı və dövlətlərarası münasibətlərdə BMT Nizamnaməsi əsasında bir-birinin suverenliyinə hörmətə sadiq qalmağı, habelə tərəfsizlik əsasında qarşılıqlı dialoqu vurğulayır. Bu körfəz dövlətləri ilə İran arasında ikitərəfli əlaqələrdə sıçrayışa səbəb olacaq”, – deyə əl-Carullah əlavə edib.

Nazir müavini bildirib ki, KƏŞ üzvləri və İran arasında gərginliyi azalmağa səylər göstəriləcək.

Küveyt rəsmisi Səudiyyə Ərəbistanı və Bəhreyn səfirlərinin Tehrana qayıdışı barədə danışmağın hələ tez olduğunu qeyd edib. O, bunun üçün lazımi zəmanətlərə nail olunmanın vacibliyini vurğulayıb.