XƏBƏR LENTİ

04 Avqust 2020

Digər Xəbərlər

03 Sentyabr 2017 - 13:28

ABŞ Kim Çen Inın raketlərini göydə tutacaq –Alyaskada radar qurğuları yerləşdirlir


Alyaskada ikinci dünya müharibəsindən qalmış “Fort Greely” bazasında onlarca raket tutan radar qurğusu yerləşdirlib.

BBC radiosunun məlumatına görə, bu barədə Britaniyanın "Express" qəzeti yazıb. ABŞ Silahlı Qüvvələrinin 100-cü Raketdən Müdafiə Briqadasının komandiri polkovnik Kevin Kik bildirib ki, bu qurğular Şimali Koreya lideri Kim Çen Inın  Birləşmiş Ştatlara mümkün hücumunun qarşısını almağa 100 faiz hazırdır.

Polkovnik Kik izah edib ki, düşmən raketinin radarda görünməsi ilə eyni anda antiraket sistemi işə düşür və bu zaman yalnız silosdan çıxan alovu görmək mümkün olur. Bu o deməkdir ki, müdafiə sisteminin raketi düşmən raketini havada "qarşılamaq" üçün uçuşa başlayıb: "Mən raketdən müdafiə sisteminin sərrast işlədiyinə yüz faiz əminəm" – deyə  polkovnik vurğulayıb.

İnterseptorlar və ya rakettutan raketlər nüvə hücumunun qarşısının alınmasında ən effektiv vasitə sayılır. Hazırda Pentaqonun “Fort Greely” bazasında və Californiyadakı başqa bir bazada toplam 36 rakettutan var. Bu raketlərin sayı ilin sonunadək 44-ə çatdırılmalıdır. Operativliyə səbəb Şimali Koreyanın Birləşmiş Ştatları qitələrarası ballistik raketlərlə hədələməsidir.

Şimali Koreya bu raketlərin Birləşmiş Ştatların ərazisini vurmaq qabiliyyətində olduğunu iddia edib. İyul ayında Pxenyan ballistik raketlərini sınaqdan çıxaranda senator Dan Sallivan demişdi ki, alyaskalılar səhəri narahatlıqla açıblar.

Bəzi ekspertlər bu qənaətdədirlər ki, gələcəkdə Pxenyan məhz Alyaskanı vurmaq qabiliyyətində ola bilər: "İndi həmişəkindən daha çox vacibdir ki, alyaskalılar və bütünlükdə Amerika xalqı həyəcana hazır olsun" – deyə senator bildirmişdi. Siyasətçi həm də vurğulamışdı ki, indi Kim Çen Inın ABŞ ərazisini vura bilmək qabiliyyətində olması "əgər" yox, "nə vaxt" məsələsidir.

Bu arada prezident Tramp da Şimali Koreyaya sərt mesajlar verib. ABŞ Koreya yarımadasına özünün strateji bombardmançılarını və radara düşməyən döyüş təyyarələrini göndərib. May ayında ABŞ Konqresinə ölkənin Şimali Koreyadan müdafiəsinin gücləndirilməsi üçün qanunvericilik aktı təqdim olunub.

Senator Brayn Sats deyib ki, bu qanun Havay, Alyaska və başqa ABŞ ərazilərinin Şimali Koreyanın ballistik raket hədəsindən qorunması üçün ordunun döyüş qabiliyyətinin gücləndirilməsinə xidmət edəcək.

Bu həftənin əvvəllərində Şimali Koreya özünün raket sınaqlarını davam etdirib. Ötən çərşənbə axşamı Şimali Koreya diktatoru ortamənzilli raketlərin sınağında şəxsən iştirak edib. Bu raketlər Yaponiya üzərindən uçaraq okeana düşüb.

Onlardan bəzilərinin elə start meydanında partladığı düşünülür.