XƏBƏR LENTİ

21 Oktyabr 2020

Digər Xəbərlər

22 İyun 2018 - 10:41

Türkiyə müxalifəti seçkiyə yarım milyondan artıq müşahidəçi göndərir –"Millət" İttifaqı saxtakarlığın ola biləcəyindən narahatdır

Türkiyə müxalifəti və insan haqları qrupları bildirirlər ki, onlar iyunun 24-də keçiriləcək prezident və parlament seçkisinin seçki məntəqələrinə yüz minlərlə müşahidəçi və könüllü göndərəcəklər.

Strateq.az-ın  azadlıq.org-a istinadən verdiyi xəbərə görə, müxalifət partiyaları və QHT-lər iyunun 21-də bəyan ediblər ki, ölkə boyunca 180 min seçki məntəqəsinə 519 min könüllü və partiyaları təmsil edən müşahidəçi göndəriləcək.

Mümkün seçki saxtakarlığından narahat olan müxalifət prezident Rəcəp Tayyip Ərdoğanın 16 illik hakimiyyətinə son qoymaq istəyir.

Ötən aprel ayında Ərdoğan bəyan etmişdi ki, seçkilər iyunun 24-də, planlaşdırıldığından bir il əvvəl keçiriləcək. Opponentləri bu qərarı onun öz hakimiyyətini möhkəmləndirmək niyyəti ilə izah edirlər.

Türkiyə hazırda siyasi hakimiyyət üsul-idarəsini dəyişərək parlament sistemindən prezident sisteminə keçir. Yeni sistemdə prezident daha çox hakimiyyət gücünə malik olacaq. Bu dəyişiklik seçkidən sonra qüvvəyə minməlidir.

Ərdoğan seçkinin tarixini elan edəndə onun qalib gələcəyi gözlənilirdi. Lakin sonradan keçirilmiş rəy sorğuları prezident seçkisində ikinci turun qaçılmaz olduğunu göstərib. İyulun 8-də keçiriləcək ikinci turda ölkəyə 16 ildir ki, rəhbərlik edən hakim partiya parlament çoxluğunu itirə bilər.

Ankara indiyədək azı iki Avropa millət vəkilinin ölkəyə seçki müşahidəçisi kimi daxil olmasını qadağan edib. Bu millət vəkilləri böyük türk icmalarının olduğu Almaniya və İsveçi təmsil edirdilər. Almaniyanın Sol Partiyasından Andrej Hunko ATƏT-in seçki müşahidəçiləri ilə birlikdə gəlməli idi.