XƏBƏR LENTİ

14 Avqust 2020
13 Avqust 2020

Digər Xəbərlər

30 Oktyabr 2018 - 11:38

Qəddafinin banklardakı milyardları üsyançılara verilir? –Qərb mətbuatından sensasiyalı iddia

Devrilmiş və linç edilərək öldürülmüş Liviya diktatoru Muammar Qəddafinin Belçika banklarında BMT Təhlükəsizlik Şurasının qətnaməsi əsasında dondurulmuş milyardlarla avro pullarının bir qisminin sirli şəkildə üzə çıxması haqda xəbərlər yayılıb.

RTBF telekanalı “BNP Paribas”, “Fortis”, ING, KBC, “Euroclear Bank” banklarında Qəddafiyə aid 14 milyard avronun olduğunu, həmin pulların üzərinə 2011-ci ildə həbs qoyulduğunu bildirir. O vaxtdan bəri faiz gəlirləri hesabına bu pullar təxminən 3-4 milyard dollar artıb, amma həmin gəlirlər naməlum şəxslər tərəfindən bankdan çıxarılıb. Ehtimal edilir ki, pullar hazırda Liviyada döyüşən qruplaşmalara yönəldilib.

Qəddafinin Belçika banklarından birində saxlanılan milyardlarının bir qisminin “yoxa çıxdığı” haqda xəbərlər hələ bu ilin mart ayında yayılmışdı. Bildirilirdi ki, 2013-2017-ci illər ərzində Belçikanın “Euroclear Bank” adlı bankından Liviyanın eks-diktatorunun bank hesablarındakı 16.1 milyard avro vəsaitin 10 milyard dolları yoxa çıxıb.

Belçika mətbuatının yazdığına əsasən 2013-cü il noyabrın 29-da həmin hesablarda 16.1 milyard avro var idi. Pullar“Libyan İnvestment Authority” və “Libyan Foreign İnvestment Company” adlı şirkətlərə aid 4 bank hesablarında saxlanılırdı. Bu şirkətlər Qəddafi ailəsi ilə bağlı olub. Lakin 2017-ci ildə Belçika hökuməti hesablarda cəmi 5 milyard avronun qaldığını aşkar edib. Mətbuat yazırdı ki, pulların Qəddafinin oğlu Seyfəlislam tərəfindən çıxarıldığı ehtimal edilir. Belçika Maliyyə Nazirliyi isə bu məlumatları təkzib etmişdi.

İndi isə bildirilir ki, BMT Təhlükəsizlik Şurasının qətnaməsi depozitlərdən əldə edilən gəlirlərə aid olmadığına görə 8 il ərzində Qəzzafinin pulları 3-5 milyard avro artıb. Amma həmin gəlirləri kimlərsə banklardan çıxarıb.

Qəddafi NATO-nun dəstəklədiyi üsyançılar tərəfindən 2011-ci ildə öldürülüb. Lakin onun ölümü Liviyada vətəndaş müharibəsini dayandırmayıb.