XƏBƏR LENTİ

07 Dekabr 2019
06 Dekabr 2019

Digər Xəbərlər

21 Noyabr 2019 - 13:49

“Tramp Ukraynaya yardımı təhqiqatla şərtləndirib” –Sondland

ABŞ Konqresinin Nümayəndələr Palatasında prezident Donald Trampın impiçment prosesi ilə bağlı dinləmələrdə şahidlər ifadə verməyə davam edir.

ABŞ diplomatı Qordon Sondland bildirib ki, prezidentin rədd etməsinə baxmayaraq, son aylar Ukraynaya Kiyevin Trampa siyasi cəhətdən fayda verəcək təhqiqata başlamasa, istədiyi hərbi yardımı almayacağı kimi şərt qoyulub.

Birləşmiş Ştatların Avropa İttifaqında səfiri olan Sonland Nümayəndələr Palatasının Kəşfiyyat komitəsində dinləmələrdə deyib ki, impiçment prosesində təhqiqatçılar bu mürəkkəb məsələləri bir sualla ifadə edirdi: “Burada əvəz-əvəz (latınca: quid pro, `xidmət və yaxud mal müqabilində göstəilən lütf`- red.) olubmu? Mənim əvvəlki ifadələrdə dediyim kimi, cavab budur: bəli.”

Brüsselə təyinat almasından üç il öncə Trampın inaqurasiya mərasiminə bir milyon dollar ianə etmiş Sonland Ukrayna məsələləri ilə əlaqədar Kiyevlə münasibətlərdə Dövlət Departamentinin rəsmi kanallarının kənarlaşdırıldığına görə özü istəməsə də Trampın şəxsi vəkili Rudi Culiani ilə işlədiyini bildirib.

Sonlandın bildirdiyinə görə, Culiani Trampın göstərişi ilə Ukrayna rəsmilərinə birbaşa bildirib ki, ABŞ lideri Ukrayna prezidenti Volodimir Zelenskinin ABŞ-ın keçmiş vitse-prezidenti Co Bayden və onun Ukraynanın Burizma təbii qaz şirkətinin direktorlar şurasının üzvü olan oğlu Hanterlə bağlı təhqiqat aparılmasını açıq şəkildə öz üzərinə götürməsini istəyir.

Tramp sentyabrın 11-də Zelenski Baydenlə bağlı təhqiqata başlamadan ABŞ-ın 391 milyon dollarlıq yardımını Ukraynaya ayırıb.

Səfir Sonland Trampla birbaşa kontaktlara malik olduğu üçün impiçment araşdırması ilə bağlı dinləmələrdə onun ifadələri digər şahidlərin ifadələrindən daha əhəmiyyətli hesab edilir.

Konqresin Nümayəndələr Palatasının Kəşfiyyat komitəsində prezident Donald Trampın impiçment araşdırması ilə bağlı ictimaiyyət üçün açıq dinləmələr artıq ikinci həftədir davam etdirilir. Keçən həftə başlayan açıq dinləmələrdə administrasiyanın keçmiş və hazırkı rəsmiləri və müşavirlər ifadə verir.

Bu həftə dinləmələrin birinci günü vitse-prezident Mayk Pensin müşaviri Cennifer Vilyams və Milli Təhlükəsizlik Şurasında Ukrayna üzrə ekspert, polkovnik-leytenant Aleksandr Vindman, ABŞ-ın Ukrayna üzrə keçmiş xüsusi nümayəndəsi Kurt Volker və Milli Təhlükəsizlik Şurasının keçmiş rəsmisi Tim Morrison Nümayəndələr Palatasının Kəşfiyyat komitəsində qanunvericilərin suallarını cavablandırıb.

Çərşənbə günü ABŞ-ın Avropa İttifaqındakı səfiri Qordon Sondland, Pentaqon rəsmisi Lora Kuper və Dövlət katibinin yardımçısı Deyvid Heyl ifadə verir. Ağ Evin keçmiş müşaviri Fiona Hill və Dövlət Departamentinin rəsmisi Deyvid Holms isə açıq dinləmələrin bu həftə sonuncu günü olan cümə axşamı ifadə verəcək. (amerikaninsesi.org)