XƏBƏR LENTİ

19 Sentyabr 2020
18 Sentyabr 2020

Digər Xəbərlər

10 Aprel 2020 - 13:37

“Avstriya Hava Yolları” iflas təhlükəsi ilə üz-üzədir- Koronavirusa görə

Koronavirus pandemiyası ilə əlaqədar bütün müntəzəm uçuşlarını dayandıran “Avstriya Hava Yolları” (AUA) aviaşirkəti iflas təhlükəsi ilə qarşılaşıb.

“Lufthansa“ konserninin tərkibində olan aviaşirkət maliyyə yardımı almaq üçün Avstriya hökuməti ilə danışıqlara başlayıb. Avstriya mətbuatının verdiyi məlumata əsasən, şirkətin təkcə bu il üçün 500-800 milyon avro vəsaitə ehtiyacı var.

Mayın 3-dək bütün uçuşları dayandıran şirkətdən bildirilib ki, əgər həmin tarixdə uçuşlar bərpa olunarsa, bu ilin yay mövsümündə ən yaxşı halda ötən illə müqayisədə 25-50 faiz az sərnişin daşınacaq. Yeddi min işçinin çalışdığı AUA rəsmiləri növbəti ildə də ağır maliyyə dövrü keçirəcəklərini bəyan edərək, koronavirusdan əvvəlki sərnişin sayına yalnız 2023-cü ildə nail ola biləcəklərini bildiriblər. Həmin dövrə kimi isə şirkəti fəaliyyətini davam etdirmək üçün əlavə vəsaitlərə ehtiyac böyükdür.

Avstriya hökumətindən şirkətin yardım üçün müraciəti təsdiqlənsə də, ayrılacaq məbləğin müqabilində aviaşirkətin üzərinə hansı öhdəliklər qoyulacağını açıqlamayıb.

Müxalifətdə olan Avstriya Sosial-Demokratlar Partiyası (SPÖ) hökumətdən AUA-ya kredit verilməsi əvəzinə, yenidən həmin şirkətin nizamnamə kapitalında payçı kimi iştirakını tələb edib.

Qeyd edək ki, Avstriyanın milli aviadaşıcısı AUA 2008-ci ildə özəlləşdirilməyə çıxarılıb və “Lufthansa” konserni dövlətə məxsus səhmlər paketini (ümumi səhmlərin 41,6 faizi) alıb. Avstriya müxalifətinin indiki tələbi dövlət yardımı müqabilində şirkət üzərində nəzarətin əldə olunmasına hesablanıb(azərtac).