XƏBƏR LENTİ

10 Mart 2021

Digər Xəbərlər

07 Yanvar 2021 - 18:42

Almaniya XİN ABŞ-dakı vətəndaşlarına xəbərdarlıq edib:"İstənilən vaxt iğtişaşlar baş qaldıra bilər”

“Odlu silahdan istifadə edilməklə etiraz aksiyalarının davam edəcəyi istisna edilmir”.

“RİA Novosti” xəbər verir ki, bu barədə Almaniya Xarici İşlər Nazirliyi ölkəsinin vətəndaşlarına ABŞ-dakı vəziyyətlə bağlı xəbərdarlığında bildirilib.

“ABŞ-da 2021-ci il yanvarın 20-də yeni administrasiyanın hakimiyyətə gəlişinədək ümumi vəziyyət istənilən vaxt dəyişə və iğtişaşlar baş qaldıra bilər”, – Almaniya XİN-in məlumatında vurğulanıb.

Nazirlik ABŞ-dakı Almaniya vətəndaşlarını komendant saatına əməl etməyə, paytaxt Vaşinqtonda etiraz aksiyaları keçirilən ərazidən uzaq durmağa çağırır.

Qeyd edək ki, 2020-ci ilin noyabr ayının 3-də ABŞ-da prezident seçkiləri keçirilib. Yekun nəticələrə görə, müxalif Demokratlar Partiyasının namizədi, 78 yaşlı senator Cozef Bayden Respublikaçılar Partiyasının təmsilçisi, hazırkı prezident Donald Trampa qalib gəlib. Buna baxmayaraq, D.Tramp seçkilərdə saxtakarlığın olduğunu açıqlayaraq nəticələri tanımayıb. Bunun fonunda ABŞ-ın bir sıra ştatlarında hazırkı prezidentin tərəfdarları nümayişlər keçirməyə başlayıb.

Yanvarın 6-da Vaşinqtonda keçirilən böyük mitinq isə iğtişaşa çevrilib. Donald Trampın tərəfdarları Konqres binasına basqın edib. Bu zaman 4 vətəndaş həlak olub, 14 polis yaralanıb.

Vaşinqton Polis İdarəsinin rəisi Robert Kontinin sözlərinə görə, vətəndaşlardan biri polisin açdığı atəş nəticəsində ölüb.

Paytaxtda qarışıqlıq düşəndən sonra Donald Tramp başda Cozef Bayden olmaqla digər siyasətçilərin təzyiqi altında tərəfdarlarına videomüraciət edib. O, müraciətdə seçki nəticələrinin oğurlandığını, lakin bununla belə zorakılığa yol verilməməsinin vacibliyini vurğulayıb.

Yanvarın 7-də ABŞ konqresinin hər iki palatasının – Senat və Nümayəndələr palatasının birgə keçirilən iclasında Cozef Baydenin prezident seçkilərindəki qələbəsi təsdiqlənib. Donald Tramp isə, öz növbəsində, yanvarın 20-da hakimiyyəti dinc yolla ötürəcəyini açıqlayıb./Report