XƏBƏR LENTİ

06 Mart 2021
05 Mart 2021

Digər Xəbərlər

26 Yanvar 2021 - 19:55

Aİ-dən koronavirusa qarşı vaksin istehsal edən şirkətlərə- Çağırış

“Avropa İttifaqından külli miqdarda sərmayələr əldə etmiş Qərb əczaçılıq şirkətləri koronavirusa qarşı vaksinlərin quruma üzv ölkələrə tədarükünə dair öhdəliklərini tam yerinə yetirməlidir”.

“Report” “DW”yə istinadən xəbər verir ki, bunu Avropa Komisiyasının prezidenti Ursula fon der Leyen onlayn formatda keçirilən Dünya İqtisadi Forumunda bildirib.

Onun sözlərinə görə, Aİ lap əvvəlcədən tədqiqat imkanları və istehsalat müəssisələri yaratmaq üçün vəsait ayırıb: “Avropa dünyanın COVID-19-a qarşı ilk peyvəndin ərsəyə gəlməsi üçün milyardlar yatırıb. İndi şirkətlər bunu təmin etməlidir, öz öhdəliklərini layiqincə yerinə yetirməlidir. Məhz bunun üçün biz vaksinlərin ixracatı üçün şəffaf mexanizm yaradacağıq”.

Qeyd edək ki, Aİ rəsmiləri Böyük Britaniya – İsveç şirkəti “Astra Zeneca”nı 27 üzv ölkəyə koronavirusa qarşı peyvəndin tədarükünə dair müqavilə öhdəliklərini pozmaqda ittiham ediblər. Belə ki, şirkət cari ilin birinci rübündə Aİ-yə razılaşdırılmış tədarükü 60 faiz ixtisar edəcəyini açıqlamışdı. Hazırda Avropa Komisiyasının yaratmaq niyyətində olduğu yeni mexanizm əczaçılıq şirkətlərini qurumun üzvü olmayan ölkələrə vaksin tədarükünə başlamaq üçün əvvəlcə Aİ-yə bildirmələrini nəzərdə tutur.

Cənubi Afrika Respublikasının (CAR) prezidenti, Afrika İttifaqının sədri Kiril Ramafosa isə forumda çıxışı zamanı “dərman millətçiliyinə” qarşı etiraz edib: “Zəngin ölkələr əllərində böyük həcmdə vaksin cəmləşdirir… Bəzi ölkələr əhalisinin ehtiyacının dördqat həcmində dərman toplayır”.