ABŞ prezidenti Donald Tramp Səudiyyə Ərəbistanı kralından neft hasilatını 2 milyon barelədək artırmağı xahiş edib.

Strateq.az xarici mətbuata istinadən bildirir ki,  Donald Tramp bu barədə “Tvitter” səhifəsində yazıb.

O bildirib ki, az əvvəl Səudiyyə Ərəbistanı kralı Salmanla telefonla danışıb: “Mən Səduiyyə Ərəbistanından İranda, Venesuelada baş verən qarşıdurmalar və anarxiya səbəbindən neft bazarında yaranmış fərqi qapatmaq üçün  hasilatı 2 milyon barelədək artırmağı xahiş etdim. Qiymətlər çox yüksəkdir, çox! Kral xahişimi qəbul etdi”.

Hələlik bu açıqlamaya Ər-Riyaddan rəsmi münasibət bildirilməyib.

 Qeyd edək ki, Tramp bundan əvvəl dünya ölkələrindən İrandan neft almamağı tələb edib. Bildirib ki, ABŞ İrandan neft alan ölkələri cəzalandıracaq. Lakin Türkiyə və Hindistan buna dərhal reaksiya verərək, Trampın tələbini rədd edib.

Onu da qeyd edək ki, əgər Səudiyyə Ərəbistanı Trampın xahişi ilə neft hasilatını 2 milyon barel artırarsa, bu, OPEC-ə qarşı çıxmaq olacaq. Çünki OPEC-in son iclasında üzv dövlətlər hasilatın bir milyon barel artırılması haqda rəsmi razılaşma əldə ediblər.

Strateq.az