XƏBƏR LENTİ

29 Oktyabr 2020
28 Oktyabr 2020

Digər Xəbərlər

17 İyul 2018 - 12:14

Tramp-Putin görüşü bitər-bitməz növbəti sensasiya –ABŞ-da Rusiya agenti tutuldu, ittihamnamə mətbuata ötürüldü

Birləşmiş Ştatlarda rusiyalı qadın saxlanıb. Onun amerikalı mühafizəkar siyasətçilər və qruplarla əlaqələr saxladığı bildirilir, Rusiya hökumətinin gizli agenti kimi çalışmaqda ittiham olunur.

İyulun 16-da irəli sürülmüş ittihamnaməyə görə, 29 yaşlı Maria Butina ABŞ siyasətçiləri ilə əlaqələr qurmağa, bu ölkədə siyasi təşkilatlara nüfuz etməyə çalışıb, eyni zamanda Moskvada yüksəkçinli məmura informasiya ötürüb. Onun ölkənin nüfuzlu silah lobbiçiliyi təşkilatı olan Milli Silah Assosiasiyasına girməyə çalışdığı vurğulanır.

İttihamnamədə deyilir ki, Butina 2015-ci ildə yazdığı emaildə silah assosiasiyasını Birləşmiş Ştatlarda konqres seçkilərinin “ən böyük sponsoru” adlandırıb, qeyd edib ki, Rusiya ABŞ-la münasibətləri yaxşılaşdırmaqdan ötrü bu qurumla, eləcə də respublikaçıların siyasi kampaniyalarının əsas dəstəkçisi olan Mühafizəkar Siyasi Hərəkət Konfransı ilə əlaqə yaratmalıdır.

Butina Rusiyada silah hüquqlarını müdafiə edən Silah Gəzdirmək Hüququ təşkilatının təsisçisidir. Ona ittihamlar Helsinkidə ABŞ prezidenti Donald Trampın rusiyalı həmkarı Vladimir Putinlə sammiti bitəndən bir neçə saat sonra irəli sürülüb.

İttihamnamədə Butinanın Rusiyanın ABŞ siyasətində maraqlarının təbliği üçün çalışdığı qeyd olunur. Onun Moskvaya 2014-cü ildə tətbiq olunmuş sanksiyaların yüngülləşdirilməsi üçün çalışdığı bildirilir.

2015-ci ilin iyulunda YouTube-da yerləşdirilmiş videoda Butina prezidentliyə namizəd Trampdan soruşur ki, prezident seçilərsə, Rusiyaya sanksiyaları dəstəkləyəcəkmi.

“Reuters” anonim mənbəyə istinadla Butinanın Trampın tərəfdarı olduğunu xəbərləyir. İddiaya görə, o, Vaşinqtonda tədbirlərdə lovğalanırmış ki, siyasi əlaqələri hesabına seçkidən sonra adamların Tramp administrasiyasında iş tapmasına kömək edə bilər.

Butinanın Moskvada yüksəkçinli hökumət rəsmisinə məlumat ötürdüyü bildirilsə də, ittihamnamədə onun adı çəkilmir. Amma həmin rəsminin “daha öncə Rusiya Federasiyasında qanunvericilik orqanının üzvü olduğu, sonradan Rusiya Mərkəzi Bankında rəhbər vəzifə tutduğu” qeyd olunur.

Bu təsvir Aleksandr Torşinə uyğun gəlir. Butinanın “Facebook” səhifəsində Torşin ilə xeyli fotosu var.

2012-ci ildə Milli Silah Assosiasiyasına ömürlük üzv seçilən Torşin apreldə sanksiyalara məruz qalmış rusiyalı oliqarxlar və məmurlar sırasındadır. Həmin sanksiyalar Putinlə münasibətlərə və “Rusiyanın məkirli fəaliyyətinin təbliğinə” görə qoyulub.

Məhkəmə sənədlərindən Butinanın özəl lobbiçi qruplarının sponsorluq etdiyi bir sıra tədbirlərə qatıldığı da qeyd olunur. Bildirilir ki, Butina ilə işləyən bir amerikalı 2016-cı ilin oktyabrında seçkiqabağı Kremllə ABŞ siyasi partiyasının “əsas” rəsmiləri arasında “özəl kommunikasiya xətti” yaratmağa cəlb olunduğunu yazıb.

Butina-nın vəkili Robert Driscoll isə iddiaları şişirdilmiş adlandırıb, deyib ki, prokurorlar adi şəbəkələşmə imkanlarını kriminallaşdırıblar. O, Butinanın Rusiyanın agenti olmadığını, Birləşmiş Ştatlarda tələbə vizasıyla qaldığını, Amerika Universitetindən beynəlxalq münasibətlər üzrə magistr dərəcəsi aldığını vurğulayıb.

Hazırda ABŞ-da xüsusi prokuror Robert Mueller prezident Trampın seçki kampaniyası ilə Rusiya arasında mümkün əlbirliyi araşdırır. Tramp və Rusiya iddiaları təkzib edib.

(Azadliq radiosu)