XƏBƏR LENTİ

04 İyun 2020
03 İyun 2020

Digər Xəbərlər

25 Aprel 2015 - 20:26

Milli Şura növbəti sessiya keçirdi – 3 may mitinqinə hazırlıqlar başladı

Əli Kərimli: “Biz mitinqlərə ara versək, növbəti devalvasiya mütləq olacaq”

Azadlıq.info saytının verdiyi məlumata görə, Demokratik Qüvvələrin Milli Şurası aprelin 25-də növbəti sessiyasını keçirib. Sessiyanın gündəliyinə aşağıdakı məsələlər salınıb:

1. İctimai-siyasi vəziyyət.
2. 3 may mitinqinə hazırlıq.
3. Təşkilati məsələlər.
4. Cari məsələlər.

Sessiyanı açıq elan edən Milli Şura sədri Cəmil Həsənli qurumun üzvü, siyasi məhbus Tofiq Yaqublunun ailəsinin bugünlərdə başına gələn faciəni xatırladıb. Milli Şura üzvləri Nərgiz Yaqublunun xatirəsini bir dəqiqəlik sükutla yad ediblər.

Sonra gündəlikdəki məsələlərin müzakirəsi başlanıb.

ölkədəki ictimai-siyasi vəziyyət barədə danışan Milli Şura sədri yaranmış iqtisadi böhrana diqqət yönəldib. Xatırladıb ki, ölkənin əsas sərvəti olan neftin istehsalı aşağı düşür, üstəlik dünya bazarında neftin qiyməti də ucuzlaşıb. Cəmil Həsənli manatın kəskin devalvasiyası və bunun ölkədə bahalaşmaya səbəb olmasından da danışıb.

Milli Şura sədri daha sonra hakimiyyətin Qarabağ siyasətini tənqid edib. Bildirib ki, torpaqlarımızın işğaldan azad olunması üçün effektiv siyasət aparılmır, 20 ildə yürüdülən siyasət özünü doğrultmayıb.

Cəmil Həsənli Azərbaycan hökumətinin Avropa İttifaqı ilə Assosiasiya sazişini imzalamaq istəməməsinə də toxunub. “May ayında keçiriləcək Riqa sammitində Asossiasiya sazişi imzalanmalıdır. Avropa İttifaqı ilə Şərq Tərəfdaşlığı proqramının iştirakçısı olan 6 ölkədən 3-ü bu sazişi artıq imzalayıb. Azərbaycan da bu sazişi imzalamalıdır. Amma biz hökumətin bunu etməmək üçün gətirdiyi müxtəlif bəhanələrin şahidi oluruq. Azərbaycan tərəfi deyir ki, Strateji Tərəfdaşlıq xarakterli proqramlarda iştirak etmək istəyir. Bunun fərqi ondan ibarətdir ki, Assosiasiya sazişi olanda hökumət demokratik dəyişikliklər, ciddi siyasi, iqtisadi islahatlar öhdəliyi götürür. Azərbaycan hökuməti isə bu islahatlardan – demokratik, azad və ədalətli seçki keçirməkdən, koorupsiyanı, monopoliyanı aradaq qaldırmaqdan qaçmaq istəyir, çalışır ki, indiki mühit qorunub saxlansın”, – deyə Milli Şura sədri bildirib.

Cəmil Həsənli günümüzün hadisələrindən olan saxta erməni soyqırımına xatirə tədbirlərinin keçirilməsinə də münasibət bildirib. O deyib ki, ermənilər uydurma soyqırımla bağlı apardıqları kampaniyada müəyyən nəticələrə həm də bizim hökumətin “əfəlliyi” ucbatından nail oldular. Milli Şura sədri vurğulayıb ki, bu mövzuda ermənilər əbəs yerə tarix müstəvisindən qaçmırlar: “Bilirlər ki, tarixi həqiqətlər onların iddialarını təkzib edir. Ona görə də məsələni siyasi müstəviyə çəkirlər”.

Daha sonra Cəmil Həsənli deyib: “Sonda siyasi məhbuslarımız haqqında demək istəyirəm. Siyasi məhbusların sayı artır. Son günlərdə Rəsul Cəfərova və İntiqam Əliyevə hökm oxundu. Məhkəmə prosesində heç nə ortaya qoyulmasa da bu insalara fantastik hökmlər oxundu. Bu məhkəmələrdən çox maraqlı bir epizod yadımda qaldı. Vəkil İntiqam bəyin məhkəməsində dedi ki, yalan-palanı yığmısız bura, indi də deyirsiz cavab ver. Hakim dedi ki, yalan-palan olsa da bu cinayət işidi. Bu yalan-palan üzərində qurulan cinayət işi bu gün insanlara ən ağır cəzanın oxunmasına gətirib çıxarır”.

***

Sonra çıxış üçün söz AXCP sədri Əli Kərimliyə verilib:

“Əvvəla dünən qeyd olunan qondarma soyqırımla bağlı danışmaq istəyirəm. Mən çox acı bir təəssüf hissi ilə izlədim ki, dünyanın bütün aparıcı kütləvi informasiya vasitələrinin diqqəti dünən bu tədbirlərə cəlb olunmuşdu. Erməni diasporası müəyyən bir siyasi uğurlar da qazanıb. Dünyanın bir hissəsinə artıq tarixi öz istədikləri kimi qəbul elətdiriblər. Bütün bu prosesi izlədikcə çox təəssüf hissi keçirirdim və görürdüm ki, Azərbaycan əslində yiyəsizdi. çünki ilk baxışda belə görünür ki, bu soyqırımla davanı Türkiyə ilə aparırlar. Bu hadisənin birbaşa bizimlə əlaqəsi yoxmuş kimi görünür. Amma bu ilk baxışda görünən səthi düşüncədi. Bizim üçün çox acıdı ki, bu gün gözümüzün qabağında bizim 20 faiz torpaqlarımız işğal altında olduğu bir halda bu işğal faktını biz dünyaya bu dərəcədə birmənalı etiraf elətdirə bilmirik. Cəmil bəyin araşdırmalarından da göründüyü kimi əslində Birinci Dünya Müharibəsinə cəlb olunmuş Türkiyənin daxilində vətəndaş müharibəsi kontekstində baş vermiş bu hadisəyə yüz ildən sonra öz gözləri ilə dünyanı baxmağa məcbur edirlər. Amma biz 20 illik tarixi, bizim işğalımızla bağlı dünyanın etirafına nail ola bilmirik. Azərbaycanı yönəldənlərin, Azərbaycanın sərvətlərinə sərəncam verənlərin, onu siyasətini müəyyənləşdirənlərin qətiyyən Azərbaycanın milli maraqlarından çıxış etmədikləri ortaya çıxır. O qondarma soyqırım abidəsinin yanında duranlar Putin, Olland idi. Bundan əlavə Serbiyanın prezidenti durmuşdu orda. 300 milyon bu xalqın boğazından kəsib aşağı faizlə Serbiyaya niyə yedizdirmisən? Bunun cavabını verməlisən. Vatikanda yer qalmayıb təmir elətdirməyə. Niyə Roma Papası ilə müvafiq söhbətlər olmadan bu işlər görülüb ki, indi bu günlərdə Roma Papası çıxıb erməni soyqırımı ilə bağlı həqiqətə uyğun olmayan bəyanatı verdi. Rusiya prezidentinin hərəkətləri isə Azərbaycan hakimiyyətini rüsvay etdi. Azərbaycan hökumətinin strateji portnyoru ermənipərəstdi. çox aydın bir şəkildə bu gün Azərbaycan hökuməti kimə söykənir, kimə güvənir, kiminlə başqalarını hədələyir? Ermənilərin böyük dostu ilə. Sonra da utanmaz-utanmaz millilikdən, vətənpərvərlikdən danışırlar. Dünən bu səhnələr seyr olunanda Azərbaycan xalqının faktiki başçısız qalmağı görünürdü. O başçı varsa da ancaq öz kürsüsünü qorumaq haqqında düşünür.

Azərbaycanın boğazından kəsib, Almaniyanın belə özünə rəva görmədiyi bahalı Avropa Yay Oyunlarını keçirirsən, 8 milyard pul xərcləyirsən, Avropada idmançı qalmır, məşqçi qalmır hamısının cib xərcliyini də verirsən və burdan da ölkənin hüquq müdafiəçilərinə, vətəndaş cəmiyyətinə, müxalifətçilərinə divan tutursan. Nəticədə o baş verir ki, Azərbaycan gündəmə öz repressiyaları ilə gəlir. Niyə belə sadə şeyləri anlamırlar? Bunu anlamayacaq insanlar nə haqla Azərbaycanı idarə edirlər? Dünya mediasında bir-biri ilə rəqabət aparan iki mövzu var. Əgər biri erməni diasporasının dəstəyi ilə keçirilən yüzilliklə bağlı hadisələrdisə, ikincisi də Azərbaycanda insan haqlarının pozulması, repressiyalardı. Əgər Azərbaycan hakimiyyəti öz xalqına düşmən kəsilməsəydi, Azərbaycan diqqət mərkəzinə gəlirdi. Bu həbslər və repressiyalar olmasaydı Azərbaycan torpaqlarının işğalda olması ilə diqqət mərkəzinə gələcəkdi. İstəyən də, istəməyən də məcbur olub bəhs edəcəkdi ki, sizin oyunlara gedəcəyiniz bu ölkənin belə bir problemi var. Hökumətin özünün yaratdığı bu süni problem torpaqların işğalını arxa plana keçirib. Artıq o məsələ nə dünyanı narahat eləmir, nə də hökumət məqsədli şəkildə bu işləri görmür. Əlbəttə, Azərbaycan hökuməti qabiliyyətsizdi, səriştəsizdi. Amma biz hər dəfə onu görürük ki, dünyada bizim fikirləşdiyimiz kimi ədalətli bir düzən yoxdu. Bunu hamımız dönə-dönə yadımıza salmalıyıq. Bizim qətiyyən gümanımız olmamalıdır ki, yer üzündə qlobal bir ədalət var. Məlum oldu ki, öz haqqını qorumağı bacarmayanların haqqını qroyacaq bir ədalət yoxdu.
Azərbaycanın varı dözləti talan edilib. 115 milyard ancaq neftdən pul gəlib. Xarici və s. Investisiyalarla birlikdə guya 180 milyard son illərdə Azərbaycan iqtisadiyyatına pul qoyulub. Cəmi beş ay neftin qiymətinin aşağı düşməsi Azərbaycan iqtisadiyyatını elə bitirib ki, indi artıq Azərbaycan hökuməti ikinci daha ciddi devalvasiyanın ərəfəsindədi. Əgər Azərbaycan hökumətinin rəsmiləri, millət vəkilləri, hökumətə yaxın mətbuat vasitələri açıq-aşkar növbəti devalvasiyadan danışırlarsa deməli ki, növbəti devalvasiya hazırlaşdırılır. çünki, bizim bütün təkliflərimizə rəğmən hökumət anti-böhran adına heç bir tədbir görmədi. Nə monopoliyanın qarşısını aldılar, nə korrupsiyanın pəhrizini saxladılar, nə iqtisadi azadlıqları təmin etmək haqqında düşündülər, nə ölkəni xarici sərmayələrə açmaq haqqında düşündülər. Hətta bizim bir çox baxımdan haqlı olaraq tənqidi yanaşdığımız Rusiyaya fikir verin, orada yarımçıq da olsa hansısa təşəbbüslər var böhranın qarşısını almaqdan ötrü. Amma bunlar qeyri neft sektorunu inkişaf elətdirmək lazım olanda banklarda manatla krediti tamam dayandırıblar. Dollarla da kredit müvafiq dövrlə qarşılaşdırdıqda 40 faiz aşağı düşüb. Dövlət sərmayəsi 50 faizdən, bankların verdiyi sərmayə 40 fazidən aşağı düşüb. Bu o deməkdi ki, ölkənin iqtisadiyyatı günü gündən dibə doğru gedəcək. Heç nə etmirlər. Hər ayın axırında hesabat verirlər ki, rezerv nə qədər azalıb. Hal hazırda 9.5 milyard rezerv var. Bu gedişlə 6-7 aylıq mərkəzi bankın rezervləri var. Bizim mitinqlərimizi və Avropa yay oyunlarını gözləyirlər. Mitinqlərimizə fasilə versək və ya mitinqlərimizdə arzuolunan kütləvilik olmasa sizi əmin edirəm ki, növbəti devalvasiya olacaq. Bu mitinqlərdən ona görə biraz çəkinirlər ki, birdən növbəti mitinqlərdə xalq kütləvi şəkildə qoşular. Ona görə inzibati qaydada gördükləri anti-böhran tədbirləri ondan ibarətdi ki, monopolistlərə gücləri çatmır xırda ticarətçiləri əzirlər. Onları məcbur edirlər ki, qiymətləri biraz da sabit saxlayın və kənardan kredit axtarırlar. Bütün avtoritar, totalitar sistemlərdən kredit alırlar. Qərb krediti istəmirlər çünki onlar hesabatlıdı, şəffaflıq tələb edirlər. Artıq Azəerenerjinin 4 milyar borcu var idi, yenidən 1 milyard da alırlar. Sonra çıxıb deyəcələr ki, Azərenerji batır, işığın qiymətini qaldırmaq lazımdı.
Ona görə də hesab edirəm ki, Milli Şura olaraq, Azərbaycanın aparıcı müxalifəti olaraq öz vəzifələrimizə bir daha diqqət yetirməliyik. Məmnunluqla ifadə etmək istəyirəm ki, şərtlərimiz ağır, resurslarımız məhdud olsa da hal-hazırda bu ölkədə məhz Milli Şura müxalifət vəzifəsini yerinə yetirir. Bizim bu yaz keçirdiyimiz mitinqlər çox yerində olan, kifayət qədər yaxşı və kütləvi tədbirlər idi. Hesab edirəm ki, bu şərtlər altında nə edilməliydisə Milli Şura onu edir. Ona görə də may ayının 3-nə növbəti mitinqi təyin etmişik”.
***

Daha sonra Milli Şura üzvləri Rahim Hacıyev və Fuad Qəhrəmanlı icitmai-siyasi vəziyyət və 3 may mitinqinə hazırlıqla bağlı fikirlərini bölüşüblər. Bununla da gündəlikdəki birinci iki məsələnin müzakirəsi yekunlaşıb.

***

Təşkilati məsələ kimi isə əvvəlcə Milli Şuranın bir neçə üzvü, o cümlədən Razi Nurullayev və KXCP təmsilçiləri qurumdan çıxarılıblar. Sonra isə üzvlük üçün yeni müraciətlərə baxılıb. Quruma üzvlük üçün ölkənin tanınmış ictimai-siyasi fəalları Səadət Cahangir, Zümrüd Yağmur, İradə Nəriman və Əfqan Muxtarlı müraciət edib. Milli Şura üzvləri onlardan Səadət Cahangir və Zümrüd Yağmurun müraciətinə müsbət yanaşaraq, üzv qəbul edilmələrinə yekdilliklə səs veriblər. İradə Nəriman və Əfqan Muxtarlının müraciətləri isə özləri iclasda iştirak etmədiyindən baxılmamış qalıb.