XƏBƏR LENTİ

24 Fevral 2020
23 Fevral 2020

Digər Xəbərlər

27 Mart 2019 - 17:23

“MƏNİ, RASİMİ TUTSALAR, GUYA NƏ OLACAQ Kİ?” –“Diqlas”ın idarəçisi danışdı

“Hava limanından birbaşa bura gəlmişəm. Xaricdə əməliyyat olunacaqdım, yarımçıq qoydum. “Diqlas” Ticarət Mərkəzinin təməli qoyulandan burdayam. Bura öz övladım kimi baxıram. Həyat elə gətirdi ki, ticarət mərkəzi iki hissəyə bölündü. Mən bu ticarət mərkəzinin bir hissəsini idarə edirəm. Hazırda obyektin qiyməti 25 milyon manatdır. Fəaliyyətim dövründə heç bir sahibkarı incitməmişəm. Məni və Rasimi tutsalar, nə olacaq ki?! Ona görə biz müzakirə etməliyik”.  “Report” xəbər verir ki,  bunu  yanan “Diqlas” Ticarət Mərkəzinin direktor müavini Araz Rəhimov zərərçəkmişlərlə görüşündə deyib.

Zərərçəkmişlər önündə çıxış edən Rəhimov problemlə bağlı sahibkarlarla görüşəcəyini bildirib: “Sahibkarlarla görüşək, onlara problemi deyək. Sahibkar kompensasiya verməyəndən sonra mən kiməm ki? Mən idarəçiyəm. Deyirlər ki, mallar sığortalanmayıb. Məndə yardım edəcək imkan yoxdur. Dövlət də deyəcək ki, sığortaları yoxdur. Sahibkarlarla görüşüm, görək dəstək olurlarmı? Olmurlarsa, mən də sizə qoşulum. Məni, Rasimi tutsalar, guya nə olacaq ki? Mən əlimdən gələni edəcəm”.

A.Rəhimov ticarət mərkəzinin tezliklə təmir olunmasını vacib sayıb: “Bu, mənim təklifimdir. Obyekt təmir olunsun, sahibkarlar fəaliyyətə başlasınlar, onlardan pul alınmasın. Ürəyim yanmasaydı, bura gəlməzdim, mən də sizinləyəm, zərərçəkmişəm. Orada olan sahibkarların da sığortası yoxdur. Ona görə də düşünüb bu məsələni başqa formada həll etməliyik. Hər kəs haqqını istəyir, dövlətin əleyhinə getmir. Xahiş edirəm, mənə vaxt verin, sahibkarların bəziləri ilə görüşüm, sonra sizə yekun məlumat verim”.

Xatırladaq ki, martın 26-da Bakının Nizami rayonu, Qara Qarayev prospekti, 8-ci kilometr adlanan ərazisindəki “Diqlas” Ticarət Mərkəzində yanğın olub. Ticarət Mərkəzi tamamilə yararsız hala düşüb. Qeyri-rəsmi məlumatlara görə, sahibkarlara milyonlarla manat ziyan dəyib.