“Gürcüstan ilin sonunadək Rusiyanın “Qazprom” şirkətindən qaz almayacaq”.

RİA Novosti-nin məlumatına görə, bunu ölkənin energetika naziri Kaxa Kaladze aprelin 12-də bəyan edib. Onun sözlərinə görə Gürcüstan ilin sonunadək yalnız Azərbaycandan qaz alacaq.

Kaladze deyib ki, Tbilisinin Rusiya qazından imtina eləməsinə “Qazprom”la imzalanmış yeni müqavilə imkan verir:“ Bizə Azərbaycan və ya İrandan qaz almaq imkanı verilir. Bu gün qərara aldıq ki, yalnız Azərbaycandan qaz alaq” –deyə Kaladze vurğulayıb.

Kaladze deyib ki, “Qazprom”la 2 illik müqavilənin müddəti bitəndə, Gürcüstan Rusiya qazından daha az aslı olacaq, bu vaxtadək ölkədə yeni qaz anbarları tikiləcək. Gürcüstan hazırda qazı əsasən Azərbaycandan alır.2018-ci ildə ölkədə yeni yeraltı qaz anbarlarının tikintisinə başlanacaq.Bu anbarları 2020-ci ildə istifadəyə vermək planlaşdırılır.Qeyd edək ki, Tbilisi ilə “Qazprom” arasındakı razılaşmaya görə Gürcüstan Ermənistana ötürülən qazın tranzit haqqına görə pul alır. Bu məbləğ Ermənistana verilən ümumi qazın 10 faizi dəyərindədir.​

Tərəflər arasındakı keçmiş müqavilənin müddəti yanvarın 1-də sona yetdi. Gürcüstan uzun müzakirələrdən sonra yanvarın ortalarında “Qazprom”un təklifini qəbul edərək onunla 2 illik yeni müqavilə imzaladı.Bu sənədə görə Rusiya tərəfi 2017 ildə tranzit haqqının bir qismini pul, bir qismini isə yanacaqla, 2018-ci ildə isə yalnız maliyyə vəsaiti ilə ödəməlidir.