XƏBƏR LENTİ

06 Avqust 2020

Digər Xəbərlər

13 Sentyabr 2019 - 18:39

Azərbaycanda 2023-cü ildə 96,9 mlrd. manatlıq ÜDM istehsal olunacaq –Maliyyə Nazirliyi

2020-ci ildə ölkədə ÜDM-in real iqtisadi artımı 2,4% olmaqla 82,7 mlrd. manat, o cümlədən qeyri-neft ÜDM-in artımı 3,3% olmaqla 54,2 mlrd. manat təşkil edəcəyi gözlənilir.

Bu barədə Maliyyə Nazirliyinin Azərbaycan Respublikasının 2020-ci ilin dövlət və icmal büdcələrinin ilkin göstəricilərinə dair hazırladığı hesabatda deyilir.

Nazirliyin məlumatına əsasən, 2021-ci ildə ölkədə 88,4 mlrd. manatlıq (artım 3,8%), 2022-ci ildə 92,7 mlrd. manatlıq (real artım 3%), 2023-cü ildə isə 96,9 mlrd. manatlıq (real artım 2,7%) ÜDM istehsal olunacağı gözlənilir. ÜDM deflyatoru növbəti iki ildə 3%-ə qədər artsa da, 2022-2023-cü illərdə 1,8% səviyyəsində qərarlaşacaq.

2020-ci ildə sahə strukturuna görə, ÜDM-in 4,8 mlrd. manatı və ya 5,8%-i kənd, meşə və balıqçılıq təsərrüfatının, 31,5 mlrd. manatı və ya 38%-i sənayenin, 6,5 mlrd. manatı və ya 7,8%-i tikintinin, 32,7 mlrd. manatı və ya 39,5%-i xidmətlərin istehsalının, 7,3 mlrd. manatı və ya 8,8%-i  məhsula və idxala xalis vergilərin payına düşəcək. Sənayenin qeyri-neft sektorunda məhsul istehsalının 8,5% artacağı proqnozlaşdırıldığı halda, neft sektorunda isə 0,9% artım gözlənilir.

Proqnozlardan göründüyü kimi ortamüddətli dövr üzrə ÜDM-nin sahə strukturunda ən yüksək real artım turistlərin yerləşdirilməsi və ictimai iaşə və informasiya və rabitə sektorları üzrə müşahidə edilir.

Qeyd edək ki, büdcə prosesinin mütərəqqi beynəlxalq standartlara uyğun daha da təkmilləşdirilməsi istiqamətində növbəti addım olacaq sənəd 2020-ci ilə və orta müddətli dövrə dair makroiqtisadi proqnozları, büdcə-vergi siyasətinin əsas istiqamətlərini, dövlət büdcəsinin prioritet gəlir və xərclərini, habelə dövlət borcuna dair əsas məlumatları özündə əks etdirir.