Dünya birjalarında dünənki kəskin çöküşdən sonra 20 ən zəngin sahibkar 68 milyard ABŞ dolları məbləğində zərərə uğrayıb.

“Forbes” xəbər verir ki, bazar ertəsi günü S&P indeksi 12 faiz, Dow Jones indeksi isə ta 1987-ci ildən sonrakı dövrə ən kəskin eniş yaşayaraq 13 faiz azalıb. Nəticədə ən zəngin şəxslərdən “Facebook”un təsisçisi Mark Zukerberq 8,8 milyard ABŞ dolları, “Microsoft”un keçmiş rəhbəri Stiv Balmer 6,9 milyard ABŞ dolları, “Oracle”ın təsisçisi Larri Ellison da 6 milyard ABŞ dolları məbləğində ziyan çəkiblər.

Bütövlükdə, son bir ayda yeni koronavirusun bazarlardakı fəsadları üzündən 20 zənginin varidatı 300 milyard ABŞ dollarına yaxın azalıb. Bunlardan “Louis Vuitton Moet Hennessy” (LVMH) şirkətlər qrupunun prezidenti Bernar Arnonun vəsaiti fevralın 13-dən etibarən 29,6 milyard ABŞ dolları azalaraq 79,9 milyarda geriləyib.

Ötən cümə axşamı da ABŞ və Avropa birjalarındakı kəskin ucuzlaşma nəticəsində zənginlərin 78 milyard ABŞ dollarından çox ziyan çəkdikləri bildirilir/Report.