XƏBƏR LENTİ

10 Mart 2021

Digər Xəbərlər

25 Yanvar 2021 - 10:05

Azərbaycan gələn il neft hasilatını artıracaq –"S&P"

“S&P Global Ratings” reytinq agentliyinin proqnozuna görə, “OPEC+” razılaşmasına uyğun olaraq, 2021-ci ildə Azərbaycanda gündəlik neft hasilatı 610 min barel olacaq ki, bu da 2020-ci ilin göstəricisinə uğundur.

Reytinq agentliyinin verdiyi məlumata görə, “OPEC+” razılaşmasının müddəti bitdikdən sonra (2022-ci ilin aprelindən sonra) ölkədə neft hasilatı 2019-cu ildə olduğu 713 min barelədək tədricən artacaq.

“Bizim neftə olan qlobal tələbatın dinamikası və Azərbaycanın tam istehsal gücünə nə qədər tez qayıda biləcəyi ilə bağlı fərziyyələrimiz qeyri-müəyyəndir”, – məlumatda qeyd edilir.

Bununla yanaşı, agentliyin Xəzərin Azərbaycan sektorunda yerləşən “Azəri-Çıraq-Günəşli” yataqlar blokunda (harada ki, son illər hasilatın təbii azalması müşahidə edilir – red.) neft hasilatının stabil olacağı ilə bağlı suallar yaranıb.

Qeyd edək ki, “OPEC+” ölkələri nazirlərinin 13-cü iclasında gündəlik xam neft hasilatı üzrə mövcud kvotaların fevral-mart aylarında da davam etdirilməsi barədə qərar qəbul edilib. “OPEC+” ölkələrinin gündəlik xam neft hasilatı üzrə ixtisarları fevralda 7,125 mln. barel, martda isə 7,5 mln. barel təşkil edəcək.

Azərbaycanın isə bu ilin yanvar ayındakı 123 min barel həcmində öhdəliyi fevral-mart aylarında sabit şəkildə qalacaq. “Əməkdaşlıq Bəyannaməsi”nə əsasən, növbəti iki ayda Azərbaycan gündəlik xam neft hasilatını 8 min barel artıraraq istehsalı 595 min barel səviyyəsində saxlayacaq.

Xatırladaq ki, Neft İxrac Edən Ölkələr Təşkilatına (OPEC) üzv və qeyri-üzv ölkələrin nazirlərinin ötən ilin dekabrında keçirilmiş 12-ci iclasında gündəlik xam neft hasilatının 2021-ci ilin yanvar ayında 0,5 mln. barel artırılması, “OPEC+” nazirlərinin hər ay keçiriləcək görüşləri vasitəsilə kvotaların qarşıdakı aylarda tədricən 2 mln. barelədək yumşaldılması razılaşdırılmışdı. (apa)