XƏBƏR LENTİ

24 Yanvar 2021
23 Yanvar 2021

Digər Xəbərlər

27 İyul 2016 - 00:25

Bazarda ətin qiyməti niyə bahalaşır? –Qubad İbadoğlunun şərhi

qubad-3

"Artıq bir neçə gündür ki, paytaxtda mal ətinin 1 kiloqramı 8 manat 50 qəpiyə satılır. Bu isə o deməkdir ki, son günlərdə mal ətinin hər kiloqramı təxminən 1 manat bahalaşmaya məruz qalıb. Gözləntilərə görə, bu, son hədd deyil, qiymət bahalaşması davam edəcək".

Strateq.az xəbər verir ki, bu fikirləri tanınmış iqtisadçı alim Qubad İbadoğlu özünün facebook səhifəsində son günlər bazarlarda ətin qiymətinin artmasına münasibət bildirərəkən, yazıb. Q.İbadoğlunun fikrincə, əslində, iqtisadi məntiqlə mövsumi amillərə görə, yay fəslində mal ətinin qiyməti sabit qalmalı idi:

"Çünki yay aylarında yaşıl yem və qüvvətli yemin qiyməti digər mövsümlərlə müqayisədə ucuz olur. Belə olan halda, ət istehsalında əsas xərc maddəsi olan yemin qiymətinin nisbətən ucuz olması məhsulun maya dəyərini aşağı salır.

Digər tərəfdən də yay aylarında kabab mövsümünə görə qoyun ətinə tələbat mal ətini nisbətən yüksək olur. Yayda mal ətinə olan tələbatın azalması onun qiymətində sabitliyi qorumalı idi. Amma bütün bunlar ət bazarında təklifin yerli istehsal hesabına təmin olunduğu halda özünü doğruldur".

Qubad İbadoğlu təəssüflə bildirir ki, hələ də daxili mal əti bazarında idxal olunan diri heyvanların payı kifayət qədər yüksəkdir:

"Müşahidələr göstərir ki, Rusiyadan ucuz qiymətə alınaraq gətirilən iri buynuzlu heyvanlar bir neçə aylıq bəsləmədən sonra bazarlarda alıcılara təklif olunur. Hazırda isə ölkədə davamlı devalvasiya və rus rublunun dəyərinin son zamanlar möhkəmlənməsi idxal olunan diri heyvanların manatla qiymətini artırır. Odur ki, hazırkı qiymətlərlə diri heyvanların ölkəyə gətirilməsi getdikcə sərfəsiz biznesə çevrilir. Bunu xarici ticarət statistikasında həmin mal mövqeyi üzrə azalan tendensiya da təsdiq edir. Belə ki, ötən ilin 6 ayı ilə müqayisədə bu ilin eyni dövründə idxal olunan diri heayvanların dəyəri 57,1 faiz azalaraq 28,9 milyon dollardan 12,4 milyon dollara düşüb".

İqtisadçının sözlərinə görə, mal ətinin qiymətində bahalaşma digər ət məhsullarının, o sıradan qoyun əti, quş əti, həmçinin balığın qiymətində də artırıcı təsirə malik olacaq:

"Xüsusilə də nəzərə alsaq təxminən ay yarımdan sonra Qurban bayramı gəlir, o halda da qoyun ətinə artan tələbatın onun qiymətini də bahalaşdıracağına şübhə qalmır.  Ət bazarında qiymət bahalaşması ilk növbədə restoranlarda və kafelərdə ətli yeməklərin qiymətini bahalaşdıracaq".