XƏBƏR LENTİ

24 Oktyabr 2020

Digər Xəbərlər

03 İyul 2018 - 16:44

Prokuror “Nardaran işi”ndə təqsirləndirilən şəxslərə cəza istəyib- Vəkillər bəraət tələb edir

Bu gün Bakı Ağır Cinayətlər Məhkəməsində sonuncu “Nardaran işi” üzrə təqsirləndirilən Elxan İsgəndərov və Əbülfəz Bünyatovun cinayət işi üzrə məhkəmə iclası davam etdirilib.

“Report”un məlumatına görə, hakim Əfqan Hacıyevin sədrliyi ilə keçirilən prosesdə dövlət ittihamçısı çıxış edib.

Dövlət ittihamçısı çıxışında E.İsgəndərovun 14 il, Ə.Bünyatovun isə 15 il müddətinə azadlıqdan məhrum edilməsini istəyib. O eyni zamanda Ə.Bünyatovun məhkəmə zalında həbs edilməsini istəyib.

Daha sonra E.İsgəndərovun vəkili Fariz Namazlı çıxış edərək müvəkkilinə verilən ittihamların qanunsuz olduğunu deyib və onun barəsində bəraət hökmünün çıxarılmasını tələb edib.

Ə.Bünyatovun vəkili Nardanə Fərzəliyeva da çıxış edərək müvəkkili barəsində bəraət hökmünün çıxarılmasını istəyib.

Ə.Bünyatov son sözündə özündə heç bir təqsir görməyib və günhasız olduğunu deyib.

Növbəti proses iyulun 11-nə təyin edilib.

Qeyd edək ki, E.İsgəndərova Cinayət Məcəlləsinin 28, 214.2.1, 28, 214.2.3, 214-2, 220.2, 228.3, 228.4, 233, 278, 279.1, 281.2, 283.2.3 və 315.2-ci maddələri ilə ittiham elan edilir. O, 5 noyabr 2015-ci ildə Sabunçu Rayon Polis İdarəsinin qarşısında baş verən hadisələr zamanı həbs olunaraq Sanunçu Rayon Məhkəməsinin qərarı ilə 15 gün müddətinə inzibati həbs olunub. Daha sonra Sabunçu Rayon prokurorunun protesti əsasında Bakı Apellyasiya Məhkəməsinin qərarilə Sabunçu Rayon Məhkəməsinin qərarı ləğv olunaraq onun əməllərində cinayət tərkibinin olub-olmamasını müəyyənləşdirmək məqsədi ilə iş Sabunçu Rayon Prokurorluğuna göndərilib.

Sonradan cinayət işi araşdırılması üçün Baş Prokurorluğun Ağır Cinayətlərə Dair İşlər Üzrə İstintaq İdarəsinə göndərilib.

E.İsgəndərov axtarışda olduğundan 15 mart 2017-ci ildə polis əməkdaşları tərəfindən həbs olunub və barəsində həbs qətimkan tədbiri seçilib.

Hazırda Ə.Bünyatovun səhhətində problem olduğuna görə, o, polisin nəzarəti altına verilib.

İttihama görə, Daxili İşlər Nazirliyi (DİN) 2015-ci il noyabrın 26-da Bakı şəhərinin Nardaran qəsəbəsində xüsusi əməliyyat keçirib. Əməliyyat zamanı Taleh Bağırov başda olmaqla daha bir neçə nəfər saxlanılaraq istintaqa təqdim edilib. Daha sonra Azərbaycan Xalq Cəbhəsi Partiyası (AXCP) sədrinin müavini Fuad Qəhrəmanlı da saxlanılıb.

Bakı Ağır Cinayətlər Məhkəməsinin hökmü ilə Taleh Bağırov 20 il, Fuad Qəhrəmanlı 10 il və digər şəxslər bir neçə il müddətinə azadlıqdan məhrum ediliblər.