Daxili İşlər Nazirliyi xaricdə yaşayan Məhəmməd Mirzəlinin qaynının döyülməsi ilə bağlı sosial şəbəkələrdə yayılan görüntülərə münasibət bildirib.

DİN-in Mətbuat xidmətindən APA-ya verilən məlumata görə, hadisə Abşeron rayonu Masazır qəsəbəsində yerləşən kafelərin birində qeydə alınıb.

Binəqədi rayonunda, Motodrom adlandırılan ərazidə məskunlaşan Elman Ağayev döyülərək müxtəlif dərəcəli xəsarətlər alması ilə bağlı nazirliyin “102 Zəng Mərkəzi”nə müraciət edib. Məsələ ilə bağlı Abşeron Rayon Polis İdarəsinin əməkdaşları təxirəsalınmaz əməliyyat-axtarış tədbirləri həyata keçirib və E.Ağayevin Masazırda kafe işlədən İlkin və Veysəl Rəciyev qardaşları tərəfindən döyülməsi müəyyən edilib.

Qeyd edək ki, hər iki qardaş əvvəllər Cinayət Məcəlləsinin xuliqanlıq maddəsi ilə məhkum olunub. Hazırda həmin qardaşlar saxlanılıb və Abşeron RPİ-nin Təhqiqat şöbəsində araşdırma gedir. Araşdırma zamanı E.Ağayevin kondisioner ustası olduğu və mübahisənin də 20 manat borc üstündə yarandığı məlum olub.

Zərərçəkən şəxs sosial şəbəkələrdə xaricdə yaşayan qohumunun polis əməkdaşlarının ünvanına səsləndirdiyi ifadələri şər-böhtan adlandırıb. O, hadisədən sonra polislərin onun başına gələn qanun pozuntusunu obyektiv araşdırdıqlarına görə daxil işlər orqanlarına minnətdarlıq edib.

Hazırda bu faktla bağlı İstintaq şöbəsində Cinayət Məcəlləsinin 221.2.1-ci maddəsi ilə cinayət işi başlanılıb, istintaq hərəkətləri davam etdirilir.