XƏBƏR LENTİ

29 May 2020
28 May 2020

Digər Xəbərlər

08 May 2018 - 22:51

TRAMP İRANLA NÜVƏ SAZİŞİNDƏN ÇIXDIQLARINI AÇIQLADI:"İrana yardım edən ölkələrə ən ağır sanksiyalar tətbiq edəcəyik"

ABŞ prezidenti Donald Tramp Birləşmiş Ştatların İranla bağlanmış 2015-ci il nüvə sazişində qalıb-qalmayacağı barədə qərarını bəyan edib.

Strateq.az Amerikanın Səsi-nə istinadla xəbər verir ki, Tramp İsrailin İranın nüvə fəaliyyətlərinə dair təqdim etdiyi dəlillərin o ölkənin yalan danışdığını sübut etdiyini deyib.

Tramp Tehranın nüvə silahı istehsalı cəhdlərini davam etdirdiyini bildirib.

ABŞ dövlət başçısı nüvə sazişinin tarixdə yol verilən ən böyük fəlakət adlandırıb.

“Mən əvvəllər də dəfələrlə sazişdəki qüsurlar aradan qaldırılmasa, ABŞ-ın sazişdən çıxacağını söyləmişdim”– deyə prezident bildirib.

“Mən bu gün bəyan edirəm ki, Amerika sazişdən çıxır. Biz İrana yardım edən ölkələrə ən ağır sanksiyalar tətbiq edəcəyik. Biz İran rejiminə “Amerikaya ölüm” deməsi ilə yanaşı, nüvə silahı istehsal etməsinə yol verməyəcəyik!…Biz sazişdən çıxdıqdan sonra müttəfiqlərimizlə İranın nüvə fəaliyyətlərinə son qoyulmasına çalışacağıq…”, – Tramp əlavə edib.

İran xalqına müraciət edən Tramp ölkənin gələcəyinin İran xalqına məxsus olduğunu önə çəkib.

Xatırladaq ki, Donald Tramp bu sazişlə bağlı narazılığını dəfələrlə ifadə edərək, Avropa müttəfiqlərinə sazişdəki “dəhşətli qüsurların” aradan qaldırılması üçün mayın 12-dək vaxt verib. İranın üzərindən ABŞ sanksiyalarının qaldırılma müddəti məhz mayın 12-də bitir.

Avropa liderləri Trampa razılıqdan çıxmaması üçün təzyiq göstərirdi. Fransa, Almaniya və Britaniyanın xarici işlər nazirləri Trampı yola gətirməyə çalışıb.

Mayın 7-də Berlində keçirilən mətbuat konfransında Almaniyanın xarici işlər naziri Heiko Mass deyib ki, “bu saziş olmadan dünya daha təhlükəli bir yer olardı”.

Eyni mətbuat konfransında onun fransız həmkarı Jan-İv Le Drian deyib ki, Qərb bu sazişin qorunub saxlanmasına çalışacaq.

O əlavə edib ki, Trampın qərarından asılı olmayaraq, Paris, Berlin və London sazişin şərtlərinə sadiq qalacaq.

İran prezidenti isə ABŞ-ın nüvə sazişindən çıxacağı təqdirdə, peşman olacağını deyib. Həsən Ruhani bildirib ki, Amerika bu əməlindən tarixdə heç görünməmiş bir təəssüf hissi yaşayacaq.

“Trampın nüvə sazişi ilə bağlı hər bir qərarına müqavimət planımız var” – deyə, Ruhani əlavə edib.

 




Yuxarı Əvvələ Ana Səhifə