XƏBƏR LENTİ

03 İyun 2020
02 İyun 2020

Digər Xəbərlər

19 May 2020 - 19:57

Zeynəb Xanlarova:"Məni öldürmək istədilər, ancaq mən uzun ömürlüyəm..."

Bu gün ölüm xəbəri yayılan Xalq artisti Zeynəb Xanlarova bu barədə müsahibə verib.

Strateq.az news24.az-a istinadla Zeynəb Xanlarovanın sağlamlığı, konsert planları, son seçkilərdə deputatlığa niyə namizəd olmaması ilə bağlı danışdığı müsahibəni təqdim edir:

– Necəsiniz, Zeynəb xanım? Çox təəssüf ki, bütün sevənləriniz səhəri üzücü xəbərlə açdı… 

– Məni öldürmək istədilər, yalandan xəbər düzəltdilər ki, güya mən vəfat etmişəm. Zeynəb hələ ölməyəcək. Mənim anam 100 yaşında rəhmətə gedib. Ona görə də mən uzunömürlülərdənəm. Məni allahım, xalqım daim yaşadacaq. Mənə də indi bu xəbərlər haqda dedilər. Zeynəb xalqını, millətini, dövlətini çox sevir və hər zaman da bu sevgiylə yaşayacaq. Özümü çox əla hiss edirəm. Hətta əladan bir az da yuxarı (gülür) Bu xəbərlər məni öldürmür, əksinə ömrümü uzadır, yaşadırlar məni. Mənim üçün pis adam yoxdur, çünki özüm pis deyiləm. Allah yazanlardan da, yazmayanlardan da razı olsun. Allah yazanlara 100 il ömür versin. Mərhum anam hər zaman deyərdi ki, sən 120 il yaşayacaqsan. Səhərə yaxın yuxudan oyandım. Oyanan kimi bu xəbəri eşitdim, təccübləndim. Gör, Azərbaycan xalqı məni nə qədər çox istəyir ki, onların dillərindəyəm, ağıllarındayam. İstəməzdim haqqımda belə sözlər yazılsın. Mən hələ indiyə qədər heç bir həkimin yanına getməmişəm. Yəni heç bir xəstəliyim yoxdur.

– Bildiyimizə görə, solo-konsertinizə hazırlaşırsınız…

– Karantin rejimi olduğundan hələ ki, evdəyəm, dincəlirəm. Arada bağa gedirəm, amma ümumilikdə ev şəraitindəyəm. Baxmayaraq ki, evdəyəm, amma konsertimə hazırlaşıram, ansamblımla məşqlər edirəm. Allahın izniylə noyabrda möhtəşəm konsertimiz baş tutacaq. Camaat məni görməyəndə çox darıxır.

– Bu yaxınlarda “uşaq pulu” məsələsinə görə tənqid olundunuz…

– Xalqımı, millətimi sevən insanam və heç vaxt onların əleyhinə gedə bilmərəm. Gedib Milli Məclisdə yoxlasınlar görüm, mən o sözü nə vaxt demişəm?! Olmayan şeylər yazırlar haqqımda. Onları Allaha tapşırıram. Mən danışanda ancaq mədəniyyətdən, musiqidən söz aça bilərəm. Daha belə məsələlərdən yox. Bu il Milli Məclisə namizədliyimi irəli sürmədim. Bu şəxsi istəyim idi. Çünki mən orda olanda haqqımda cürbəcür şeylər yazırdılar. İllərlə qazandığım hörməti itirməmək üçün getmədim. Bu məsələ mənim yaralı yerimdir. Mən hamını sevirəm, amma bu sözləri yazan şəxs məni sevmir və məni xalqın gözündən salmaq istəyir. Zeynəb heç vaxt xalqın gözündən düşən deyil. Mən daim Milli Məclisin arxa qapısından çıxıram ki, heç kimin gözünə dəyməyim. Çünki haqqımda çox pis şeylər yazan insanlar var, Allahlarını itirirlər. Yaxşının yerinə pis yazırlar. Olan şeyi yazsalar nə olardı ki?

– Altı nəvəniz var. İkinci Zeynəb yetişirmi? 

– İndi istirahət edirəm, heç kimlə görüşmürəm. Hətta nəvələrimlə ancaq uzaqdan-uzağa qapının ağzında görüşürəm. Altı nəvəm var. Üç qız, üç oğlan. Nəvəmin biri öz adımı, ikincisi anamın, üçüncüsü isə həyat yoldaşımın adlarını daşıyırlar. Zeynəb, Pəri, Səlim. Dədə-baba yoluyla gedirik.

– Bəs ailənizdə sənətinizi davam etdirən varmı?

– Ailədə bir Koroğlu olar (gülür).