Erməni hakerləri tərəfindən tərəfindən dağıdılmış www.nofalsify.com, www.erevangala.com və www.caucasianhistory.com saytlarının fəaliyyəti bərpa edilib.

Bu saytlar Cənubi Qafqazın tarixşünaslığı üzrə ixtisaslaşıblar və səhifələrində tarixi həqiqətlərə dair sənədləri paylaşırlar.

“Haker hücumları erməni ictimaiyyətinə informasiya dəstəyi proqramı çərçivəsində may ayının 29-da “Azərbaycan və Ermənistanın alternativ tarixi” filminin təqdimatı ilə eyni vaxta düşdü. Hücumların geniş miqyaslı olması və eyni vaxtda baş verməsi qətiyyətlə deməyə imkan verir ki, bizim layihələrimiz Ermənistanda müəyyən qüvvələrin xoşuna gəlməyib və biz doğru istiqamətdəyik”, – deyə layihələrin rəhbəri, Prezident Administrasiyasının sektor müdiri Fuad Axundov “İnterfaks-Azərbaycan” agentliyinə bildirib.

Bununla yanaşı, o qeyd edib ki, layihə Ermənistanın müəyyən elmi dairələri tərəfindən böyük maraqla qarşılanıb. “Bizim layihəmiz bir çox erməni alimlərin diqqətini cəlb edib, regionumuzun tarixşünaslığının öyrənilməsinə faktlarla zəngin, qərəzsiz yanaşmamız onlarda maraq oyadıb. Düzünü desək, bu, bir tərəfdən təəccüb doğurur ki, hətta erməni professorlar da bu faktlar və hadisələr barədə ilk dəfə eşidirlər. Digər tərəfdən isə bu, qanunauyğundur, axı bu günə qədər hətta erməni alimlər də onların tarixşünaslığına əsaslandığı saxtakarlıqların əsarətində yaşayıblar”,- deyə F.Axundov qeyd edib.

“Saytı dağıdanlara gəlincə, mən onları məyus etmək istəyirəm. Biz onların kriminal əməllərinə baxmayaraq, erməni ictimaiyyətinin, o cümlədən erməni alimlərin məlumatlandırılması istiqamətindəki işimizi davam etdirəcəyik, onları bundan sonra da haqqında təsəvvürlərinin olmadıqları elmi faktlarla tanış etməkdə davam edəcəyik. Biz bu fəaliyyət çərçivəsində daha iki filmin təqdimatı üzərində işi başa çatdırırıq, onların təqdimatı sentyabr ayında keçiriləcək. Bu filmlər də bu günə qədər geniş ictimaiyyətə məlum olmayan faktları gün işığına çıxaracaq. Və bu faktlar şübhəsiz ki, elmi ictimaiyyətdə yeni maraq dalğası yaradacaq”, – deyə F. Axundov qeyd edib