XƏBƏR LENTİ

20 Sentyabr 2020
19 Sentyabr 2020

Digər Xəbərlər

08 Oktyabr 2016 - 16:45

Müstəqillik, Papanın səfəri, Kerrinin çıxışı… –BQP-dəki iclasda müzakirə olundu

fazilmustafa-223.jpg

Bu gün partiya başqanı Fazil Mustafanın sədrliyi ilə keçirilən BQP Siyasi Qurulunun iclasında partiyadaxili, eləcə də ölkə və dünya gündəmində yer alan digər məsələlər müzakirə edilib.

Partiyadan Strateq.az-a verilən məlumata görə, Siyasi Qurulda partiya üzvlüyünə qəbul olunmaq üçün fərdi şəkildə edilən çoxsaylı müraciətlərə baxılıb və bununla bağlı müvafiq qərar qəbul edilib.

İclasda partiya Başqanı F.Mustafanın müstəqillik gününün dekabrın 29-da qeyd edilməsi ilə bağlı təşəbbüslə çıxış etməsinə dəstək ifadə edilib.

 Qeyd edilib ki, “1991-ci il dekabrın 29-da Azərbaycanın dövlət müstəqilliyi haqqında Ali Sovetin Konstitusiya Aktının qəbul olunması ilə bağlı keçirilən referendumda seçicilərin mütləq əksəriyyətinin qoyulan məsələnin lehinə səs verməsi ilə Azərbaycanın xalqının iradəsi ortaya qoyulub. Referendum Aktı birbaşa xalqın iradəsinə söykəndiyindən həmin bayramın məhz bu tarixdən hesablanması daha legitim və mötəbər hüquqi əsaslar yaradır”.

Siyasi Qurul Roma Papası Fransiskin Azərbaycana səfəri və səsləndirdiyi fikirlərə münasibət bildirib.

Bütövlükdə səfərin əhəmiyyətli olması, tolerant ölkə reallıqlarının birbaşa ali katolik nümayəndə heyəti tərəfindən müşahidə edilməsi, xüsusən də Azərbaycan Prezidenti ilə Papanın görüşündə Dağlıq Qarabağ məsələsini gündəmə gətirilməsi, işğalçı Ermənistanın təcavüzkar siyasətinin ifşa edilməsi və Azərbaycan dəyərlərinin katolik dünyasında tanıdılması baxımından faydalılığı qeyd edilib: “Bununla yanaşı Papanın xristian təəsübkeşliyindən xilas ola bilməməsi, problemlərə yanaşmasında ikili standartlara yol verməsi açıq şəkildə özünü biruzə verdi. Vatikan liderinin eyni problemlər yaşayan iki ölkəyə-Gürcüstan və Azərbaycana fərqli münasibətlər göstərməsi, çıxışlarında bir ölkənin ərazi bütövlüyünə açıq dəstək ifadə etməsi, digəri haqqında isə bir dəfə də olsun, işğal barədə söz etməməsi, Ermənistanın təcavüzkar siyasətini qınamaması Papanın səmimi olmamasını göstərdi”.

İclasda bu yaxınlarda Moskvada keçirilən separatçıların növbəti “paradında” Dağlıq Qarabağ və talış separatçılarının iştirakına münasibət bildirilib.

Qeyd edilib ki, həm Qarabağ həm də talış separatçıları çıxışları zamanı Azərbaycan dövləti əleyhinə təxribat xarakterli ciddi ittihamlara yol verilib, habelə Nuru Paşanın Azərbaycana gəlişi zamanı kütləvi miqyasda talışların Qafqaz İslam Ordusu tərəfindən məhv edildiyi ilə bağlı cəfəng fikirlər səsləndirilib:

“İstər ermənilərin, istərsə də vətən xaini talış separatçılarının guya Nuru Paşanın kütləvi şəkildə həmin xalqları qətl etməsi barədə iddiaları tarixi həqiqətlərlə yaxından və uzaqdan əlaqəsi olmayan uydurmadan başqa bir şey deyil. Tarix Nuru Paşanın Azərbaycanda yalnız müsəlmanları qətl edən vəhşiləşmiş ermənilərdən qisas aldığına şahidlik edir. Talışların qətl edilməsi ilə bağlı fikirlər isə təkzibə ehtiyacı olmayan iftiradır. Çünki, Qafqaz İslam Ordusu mənsublarının əxz etdiyi türk-islam mənəviyyatı və əxlaqında “MİLLƏT” yox “ÜMMƏT” anlayışı əsas götürülür. Talışlar da dini məsubiyyətlərinə görə özlərini bizlər üçün fəda edən türk əsgərlərinin qoruması altında olublar”.

BQP Siyasi Qurulu ümid edir ki, talış xalqının ləyaqətli övladları, ictimai-siyasi xadimləri, qeyri-hökumət təşkilatlarının fəalları, ziyalılar xalqına iftira atan, ermənilərin əli ilə yazılan ssenaridə rol alan xəyanətkarlara tutarlı cavab verməklə ölkə ictimaiyyətinin gözləntilərini doğruldacaqlar.

İclasda ABŞ-ın Dövlət katibi C.Kerrinin Dağlıq Qarabağ məsələsinin həllinə münasibətdə səsləndirdiyi fikirlərə etiraz edilib.

Bildirilib ki, C.Kerrinin “Müasir dünyada Ermənistan – Azərbaycan Dağlıq Qarabağ münaqişəsi kimi bir neçə dondurulmuş münaqişə var ki, onların nizamlanması hazırda mümkünsüz görünür”-deməsi Dağlıq Qarabağ münaqişəsinin həlli ilə bağlı ABŞ-ın üzərinə götürdüyü öhdəliklərə, beynəlxalq hüquq normalarına və adı çəkilən ölkənin prezidentinin status-kvonun qəbuledilməzliyi ilə bağlı rəsmi bəyanatna ziddir: "BMT Təhlükəsizlik Şurasının daimi üzvü, ATƏT-in Minsk qrupunun həmsədri olan dövlətin ali vəzifəli şəxsinin belə fikir səsləndirməsi əslində, ABŞ-ın münaqişənin həll olunmamasında maraqlı olduğunu, problemə əhəmiyyətsiz yanaşdığını, illər ərzində işğalçını qorumağa hesablanmış ənənəvi siyasətlərinin davam etdirildiyinin etirafıdır”.

Siyasi Qurul cari məsələlərin müzakirəsi ilə öz işini yekunlaşdırıb.