Avropa Birliyi Şərq Tərəfdaşlığı Vətəndaş Cəmiyyəti Forumu Azərbaycan Milli Platforması Ermənistan prezidenti Serj Sərkisyanın Brüssel səfəri ərəfəsində Avropa İttifaqı Şurasının prezidenti Donald Tusk, Avropa Komissiyasının prezidenti Jan-Klod Yunker,  Avropa İttifaqının xarici işlər və təhlükəsizlik siyasəti üzrə ali nümayəndəsi Federika Mogerini və  Avropa İttifaqının genişlənmə və qonşuluq siyasəti üzrə komissarı Yohannes Hana müraciət edib. 

Bu barədə Strateq.az saytına Milli Platformanın üzvü, Açıq Hökumət Platformasının koordinatoru Əliməmməd Nuriyev məlumat verib.

O, qeyd edib ki, müraciətə Azərbaycan Milli Platforması üzvlərinin əksəriyyəti imza atıb.

Ə.Nuriyevin sözlərinə görə, müraciətdə Avropa Şurası və Avropa İttifaqı rəhbərliyinə səfərdən istifadə edərək  Ermənistan prezidentinin sülh danışıqlarının vacibliyinə inandırmaq üçün səy göstərilməsinə çağrış edilib. Müraciətdə qeyd olunur ki, Platforma üzvləri regionda sülh və sabitliyi təhlükə altında qoyan Ermənistanın destruktiv siyasətindən çox narahatdırlar: “Bununla əlaqədar biz Sizi prezident Sərkisyana Aİ-ni xarici siyasət və təhlükəsizlik məsələləri üzrə qlobal strategiyasına uyğun olaraq Avropa daxilində,  ondan kənarda dövlətlərin ərazi bütüövlüyü, suverenliyi və sərhədlərinin toxunulmazlığının qitədə təhlükəsizliyin təmin olunmasının əsas prinsipi olmasını xatırlatmağa çağırırıq”.

Ə.Nuriyev bildirib ki, eyni zamanda müraciətdə Azərbaycan torpaqlarının Ermənistan tərəfindən işğal olunması,  Azərbaycanın ərazi bütövlüyünün tanınması ilə bağlı beynəlxalq təşkilatlar və Avropa Şurası, Avropa İttifaqı tərəfindən qəbul edilən sənədlər, AHİM-in qərarı xatırladılır. Müzakirələr zamanı bu sənədlərdən irəli gələn öhdəliklərin Ermənistan rəhbərliyinin diqqətinə çatdırılması xahiş olunur.