Yenicə üzə çıxmış məktubda keçmiş prezident Barak Obamanın təzə prezident Donald Trampa nəsihət verdiyi məlum olub.

"The Guardian" qəzeti yazır ki, ABŞ-ın 44-cü prezidenti 45-ci prezidentə yazdığı məktubda onu qanunun alililyi prinsipinə əməl etməyə və "beynəlxalq dünya nizamını" pozmamağa çağırır.

Obama Ağ Evdə Trump üçün qoyub getdiyi məktubda ona üç əsas məsləhət verib: "Bizim hər ikimizin bəxtinə, müxtəlif şəkildə olsa da böyük tale düşüb. Hər adamın bəxti belə gətirmir. Odur ki, yaxşı zəhmət çəkmək istəyən hər bir uşaq və hər bir ailə üçün daha çox imkan nərdivanları düzmək bizim ixtiyarımızdadır".

Beynəlxalq münasibətlərə gəlincə isə, Obama seçki kampaniyası boyunca Amerikanı təcrid edəcək siyasətlərdən danışan Trampa yazıb ki, "bütün dünyada Amerikanın liderliyi əvəzsizdir". Bunun ardınca Obama Trampı soyuq müharibədən bu yana bərqərar olan dünya nizamını pozmamağa çağırırdı. O yazırdı ki, Amerikanın özünün sərvəti və salamatlığı bu nizamdan asılıdır.

Üçüncü məsləhət olaraq Obama Trampa yazır ki, "biz bu kabinetə həmişəlik burda qalmaq üçün gəlməmişik və ona görə də demokratik təsisat və ənənələri ən azı biz gələndə necə idisə, elə də qoyub getməliyik".

Yanvar ayında Tramp bu məktubu "gözəl" adlandırmışdı və əlavə etmişdi ki, "biz hətta bu məktubda yazılanları mətbuat üçün açmayacağıq. Lakin sonrakı hadisələr göstərdi ki, Tramp bu "gözəl" məktubdakı məsləhətlərə çox da qiymət verməyib. "The Guardian" yazır ki, Tramp öz sələfinə minnətdar olmaqdansa, Tvitterdə daim onu sancmaqla məşğul idi.

Məqalədə deyilir ki, bu məktub Obamanın öz xələfinə verdiyi yeganə nəsihət deyildi. “The New York Times” qəzeti mart ayında yazırdı ki, təhvil-təslim zamanı Obama Trampa Şimali Koreya məsələsinin onun üçün ən çətin məsələ olacağını da deyibmiş. "The Guardian" yazır ki, ABŞ ənənəsinə görə vəzifədən gedən prezident vəzifəyə gələn prezidentə arzularını bildirir. Kiçik Corc Buş Klintona məktubuna belə başlayırdı: "Nömrə 44-ə nömrə 43-dən". Ata Buş Klintona yazırdı: "Sənin uğurun ölkəmizin uğurudur. Mən sənə yol açmaq üçün çox çəlləşmişəm".

Ronald Reyqan  isə özünün keçmiş vitse-prezidentiBuşa yazmışdı: "İmkan vermə ki, hinduşkalar səni yıxsın". İngilis jarqonunda "hinduşkalar" – axmaq adamlar mənasında işlənir. (BBC)