XƏBƏR LENTİ

26 Oktyabr 2020

Digər Xəbərlər

27 Noyabr 2017 - 12:39

BQP Siyasi Qurulu toplandı:“Bu nəticə uğur kimi qiymətləndirilə bilər”

Bu gün Böyük Quruluş Partiyası (BQP) Siyasi Qurulunun növbəti iclası keçirilib.

BQP-dən Strateq.az-a verilən məlumata görə, partiya başqanı Fazil Mustafanın sədrliyi ilə keçirilən iclasda ictimai siyasi vəziyyət, təşkilati məsələ, yerli təşkilatlarda hesabat- seçki yığıncaqlarının keçirilməsi vəziyyəti, partiyanın 2018-ci ildə fəaliyyətinin əsas istiqamətləri layihəsinin hazırlanması və digər məsələlər müzakirə olunub.

Partiya Başqanı öz çıxışında Milli Məclisdəki fəaliyyəti, iştirakçısı olduğu beynəlxalq və ölkə əhəmiyyətli tədbirlər, keçirdiyi görüşlər haqqında toplantı iştirakçılarını məlumatlandırdı, ölkənin ictimai-siyasi həyatında baş verən hadisələrin əhatəli təhlilini verərək, seçki ilində partiya strukturları qarşısında duran vəzifələrlə bağlı tövsiyə və tapşırıqlarını verib.

İclasda təşkilati məsələ müzakirə olunub. Partiyanın Təşkilati məsələlər şöbəsinə tapşırıq verilib ki, rayon təşkilatının sədrinin vəfatı ilə əlaqədar olaraq yaxın bir ay ərzində Xətai rayon şöbəsində növbədənkənar konfrans keçirilməsini və müvafiq təşkilati məsələlərin həllini təmin etsin.

Siyasi Qurulda “Partiyanın 2018-ci ildə fəaliyyətinin əsas istiqamətləri haqqında sənədin layihəsini hazırlamaq üçün BQP Ali Məclisinin sədri Əjdər Əliyevin sədrliyi ilə İşçi Qrupunun yaradılması və dekabr ayının ortalarınadək həmin sənədin layihəsinin müzakirəyə çıxarılması haqqında qərar qəbul edilib.

İclas iştirakçıları rayon və şəhər təşkilatlarında keçirilən hesabat-seçki yığıncaqlarının gedişi haqqında Təşkilat şöbəsinin məlumatını dinləyib və yerli təşkilatlardakı konfrans və ümumu yığıncaqların gedişi vəziyyətinin qənaətbəxş hesab edilməsi barədə qərar qəbul edilib.

Siyasi Qurulda Soçi şəhərində Rusiya-Türkiyə-İran prezidentləri arasında keçirilən görüşün Suriyanın ərazi bütövlüyünün saxlanması, separatizmin və etnik millətçiliyin qarşısının alınması, bütövlükdə regionda sabitliyin bərqərar edilməsi, eləcə də Rusiya-Türkiyə münasibətlərində müşahidə edilən əməkdaşlıq və etimad mühitinin möhkəmlənməsinin Azərbaycanın da maraqlarına cavab verməsi baxımından əhəmiyyətli olması vurğulanıb.

İclas ATƏT-in Minsk Qrupunun həmsədr ölkələrindən biri olan Fransaya Azərbaycanın Ermənistan silahlı qüvvələri tərəfindən işğal edilmiş ərazilərində yaradılmış qanunsuz rejimin təmsilçisi kimi özünü təqdim edən Bako Saakyan adlı şəxsin səfərinə kəskin etirazını bildirib: “Əhalisi 7,5 milyon nəfər olan və güclü iqtisadiyyata malik İspaniyanın Kataloniya hökumətinin bütün rəhbər vəzifəli şəxslərinin təqib və həbs olunduğu, nüfuzlu beynəlxalq təşkilat və böyük dövlətlərin İspaniyanın ərazi bütövlüyünü birağızdan, xorla dəstəklədiyi halda, faktiki olaraq 100 mindən bir qədər artıq əhalisi olan Dağlıq Qarabağın işğalçı-şovinist separatçıların liderinin Ermənistanın diplomatik pasportu ilə səyahətinə şərait yaradılması gülünc göründüyü kimi həm də ikiüzlü və dualist standartların şəksiz nümunəsidir. Halbuki, təhlükəli separatizm meyllərinin qarşısının alınması və dövlətlərin ərazi bütövlüyü, suverenliyi və sərhədlərinin toxunulmazlığı ilə əlaqədar vahid və birmənalı siyasətin yürüdülməsi Avropa İttifaqına üzv ölkələrin də üzləşdiyi problemlər nəzərə alınarsa, onların özləri üçün də həyati zərurət təşkil edir”.

Siyasi Qurulda Brüssel sammitinin Azərbaycan üçün çox faydalı keçdiyi qeyd olunub “Noyabrın 25-də Belçikanın paytaxtında keçirilən Şərq Tərəfdaşlığı ölkələrinin sammitinin yekununda qəbul edilən Birgə Bəyannamədə Şərq Tərəfdaşlığının bütün dövlətlərinin ərazi bütövlüyü, müstəqilliyi və suverenliyi birmənalı olaraq dəstəklənib . Azərbaycanın ərazi bütövlüyü ilə bağlı bəndin Avropa Birliyi ölkələri ilə ikitərəfli münasibətlərdə həmişə mövcud olmasına baxmayaraq, müxtəlif səbəblərdən bəndin bu vaxtadək sazişə salmağın mümkün olmaması nəzərə alınarsa, bu nəticəni uğur kimi qiymətləndirmək olar”.

Sonda cari məsələlər müzakirə olunub.