XƏBƏR LENTİ

30 Oktyabr 2020

Digər Xəbərlər

15 Yanvar 2018 - 23:57

“Siyasi məhbus” siyahısı yeniləndi –161 nəfər

Siyasi Məhbusları Müdafiə Mərkəzi (SMMM) Azərbaycanda siyasi məhbus saydıqları şəxslərin siyahısını yeniləyib.

Strateq.az Amerikanın Səsi-nə istinadla xəbər verir ki, bu siyahıya mühacir, jurnalist Türkel Azərtürkün bacanağı Emin Saqiyevin, Müsavat Partiyasının Şirvan təşkilatının rəhbəri Əlikram Xurşudovun və yenidən həbs edilən keçmiş “hicab məhbusu” Elşən Abbasovun adları daxil edilib.

Emin Saqiyev qanunsuz narkotik dövriyyəsi, Əlikram Xurşudov xuliqanlıq ittihamı ilə həbs edilib. Elşən Abbasov isə qanunsuz narkotik və silah saxlamaqda ittiham olunur. Onların haqqında məhkəmə istintaqı başa çatmayıb.

Hüquq müdafiəçiləri hesab edir ki, onlar siyasi sifarişlə və uydurma ittihamlar əsasında həbs edilib.

Beləliklə, onların bildirdiyinə görə, siyasi məhbusların sayı 161 nəfərə çatıb.

Xatırladaq ki, bu, Azərbaycanda siyasi məhbus sayılan şəxslərlə bağlı hüquq-müdafiə təşkilatlarının vahid siyahısı deyil. Azərbaycanda siyasi məhbus siyahısı hazırlayan iki yerli qrup var. Hüquq müdafiəçiləri, keçmiş məhbuslardan ibarət olan həmin qruplar vaxtaşırı siyahı hazırlayıb yayırlar. Siyahılar arasında say baxımından fərq var.

Azərbaycan rəsmiləri isə ölkədə siyasi məhbus olması fikri ilə razılaşmırlar. Onlar deyirlər ki, Azərbaycanda düşüncələrinə, siyasi mənsubiyyətinə görə heç kim həbs edilmir.

Hakimiyyət nümayəndələrinin fikrinə görə, adları siyasi məhbus siyahısında yer alan insanlar törətdikləri əməllərlə bağlı məsuliyyətə cəlb ediliblər.

Bir neçə siyasi məhbus sayılan şəxsin hüquqlarının pozulduğunu Avropa İnsan Hüquqları Məhkəməsi də tanıyıb.