"Rusiya parlamentində "Türkiyə ilə imzalanmış Qars müqaviləsi qüvvədən düşməlidir" çağırışlarından narahat olmağa dəyməz".

Strateq.az xəbər verir ki, bunu “Atlas” Analitik Mərkəzinin rəhbəri Elxan Şahinoğlu deyib.

Onun sözlərinə görə, birincisi, bu müqavilə pozularsa, yaranacaq durum Türkiyədən çox, Rusiyanın maraqlarına toxunacaq:

"Çünki Türkiyə kimi Rusiyanın da üzərinə götürdüyü öhdəlik və məhdudiyyətlər var. Bu öhdəlik və məhdudiyyətlər ortadan qalxacaqsa, Türkiyə üçün Cənubi Qafqazda istədiyi kimi hərəkət etmək üçün məhdudiyyət qalmayacaq. Ermənistanın narahatlığı üçün ciddi əsaslar yaranacaq.

İkincisi, Naxçıvanın təhlükəsizliyindən də narahat olmağa dəyməz. Qars müqaviləsi pozulacaqsa, Azərbaycan Naxçıvanın təhlükəsizliyi ilə bağlı Türkiyə ilə ikitərəfli təminat müqaviləsi bağlaya bilər. Türkiyənin Naxçıvanda hərbi bazası olacaqsa, Ermənistan ora burnunu soxmağa risk etməyəcək.

Ekspert deyir ki, zatən Rusiya beynəlxalq və ikitərəfli razlaşmalara əməl etmir:

"Dağlıq Qarabağ və ətraf rayonlar işğal altındadır və Rusiya birbaşa işğalçı Ermənistana dəstək verdiyini gizlətmir. Bunun özü Qars müqaviləsinə ziddir. Rusiya beynəlxalq müqavilələrə hörmətlə yanaşsaydı, Krımı işğal etməzdi. Halbuki, 1994-cü ildə Budapeştdə imzalanan sazişə görə Ukrayna nüvə silahlarının Rusiyaya verilməsi müqabilində Kreml qeyd-şərtsiz Ukraynanın ərazi bütövlüyünü tanıdığını və dolayısıyla heç bir zaman Krıma göz dikməyəcəyini vəd etmişdi: "Heç bir zaman"ın ömrü cəmi 20 il çəkdi…"