XƏBƏR LENTİ

06 Avqust 2020

Digər Xəbərlər

18 İyun 2018 - 23:40

Tərtərdən olan 14 pambıqçı nədən xəstəxanaya düşüb? –Kliniki Mərkəz analiz üçün nümunələrdə zəhərlənmə aşkar etməyib

 

İki gün öncə Tərtər rayonundan 14 pambıqçı zəhərlənmə diaqnozu ilə Yevlax Mərkəzi Xəstəxanasına gətirilib.

Klinik Tibbi Mərkəzin toksikologiya şöbəsinin müdiri Azər Maqsudov BBC News Azərbaycancaya deyib ki, pambıqçılardan götürülüb analiz üçün onlara göndərliən nümunələrdə zəhərlənmə aşkarlanmayıb: “Analizlər laboratoriyada yoxlanıb, hər hansı zəhərlənmə əlamətləri yoxdur. Zəhərlənmə təsdiqlənmədi, amma nə baş verib, bunu deyə bilmərəm”, – Azər Maqsudov deyib.

O əlavə edib ki, Yevlax Mərkəzi Xəstəxanasına daxil olan xəstələrdə vəziyyət dəyişikliyi olub: “Biz xəstələri görməmişik, ona görə də ətraflı bir şey demək çətindir”.

Hazırda Yevlax Mərkəzi Xəstəxanasına gətirilən pambıqçılardan bir qadın hələ də reanimasiyadır. Bunu İcbari Tibbi Sığorta üzrə Dövlət Agentliyindən BBC News Azərbaycancaya deyiblər. Qurumun mətbuat xidmətinin rəhbəri Aynurə Əhmədovanın sözlərinə görə, xəstəxanaya gətirilmiş 14 nəfərdən 9-u evə buraxılıb, 4-ü reanimasiyadan adi palataya keçirilib: “Yalnız bir qadının vəziyyəti stabilləşmədiyi üçün hələ də reanimasiyadadır”, o bildirib.

“Pambıqçılara qoyulan diaqnozla bağlı son sözü Klinik Tibbi Mərkəzin toksikologiya şöbəsi nümunələrin analizi əsasında verəcək”, Aynurə Əhmədova vurğulayıb.

Qeyd edək ki, iyunun 16-da 14 nəfərin Tərtərin Seyidimli kəndində pambıq tarlasında çalışarkən zəhərləndiyi xəbəri yayılıb. Onlardan 8-i Yevlax sakini olub.

Bundan bir neçə gün əvvəl isə Saatlıda pambıq tarlasında çalışan 24 nəfər zəhərlənmə diaqnozu ilə xəstəxanalara yerləşdirilib. Onların alaq otları və zərərvericiləri məhv etmək üçün istifadə olunan kimyəvi maddədən zəhərləndiyi bildirilmişdi.