XƏBƏR LENTİ

04 Dekabr 2020

Digər Xəbərlər

15 İyul 2018 - 10:54

Gürcüstanda güclü yağış yağıb: evləri su basıb, körpülər dağılıb –50 ailə ətrafdan təcrid olub

İyulun 14-də Gürcüstan ərazisində yağan güclü leysan yağışları bölgələrdə ciddi problemlər yaradıb.

“Report”un Gürcüstan bürosu xəbər verir ki, ən çox ziyan Gürcüstanın şimalındakı Raca regionuna dəyib. Rioni çayının daşması nəticəsində körpülər dağılıb, yaşayış evlərinə su dolub, kənd təsərrüfatı obyektləri, əkin sahələri su altında qalıb.

Onsk bələdiyyəsinin Qebi kəndində 50 ailə ətraf aləmdəm tam təcrid olunub.

Lixeti və Urevi kəndləri də təbii fəlakətin qurbanına çevrilib. Evləri su basıb, yollarda torpaq sürüşməsi baş verib.

Ümumilikdə 10-dan çox kəndə ciddi ziyan dəyib, infrastruktur dağılıb. İnsan tələfatı barədə məlumat verilmir.

Təbii fəlakət bölgəsinə xilasedicilər, ağır texnika cəlb olunub. Lakin hələlik heç bir əməliyyat həyata keçirilmir. Xilasedicilər Rioni çayında suyun səviyyəsinin enməsini gözləyirlər.

Mətbuatın yazdığına görə, hazırki şəraitdə heç bir əməliyyat həyata keçirmək mümkün deyil.