XƏBƏR LENTİ

08 Avqust 2020
07 Avqust 2020

Digər Xəbərlər

27 İyul 2015 - 11:39

“Bəzi məmurlar buna məhəl qoymurlar…” – Qarabağ əlilləri
Bu gün Beynəlxalq Mətbuat Mərkəzində “Qarabağ qaziləri” və “Vətən Müharibəsi Əlilləri” birlikləri Azərbaycan Respublikası Prezidenti Yanında QHT-lərə Dövlət Dəstəyi Şurasının maliyyə dəstəyi ilə “Qarabağ əlillərinin problemlərinin həllinə dəstək” layihəsi çərçivəsində I konfransını keçirib.
Strateq.az xəbər verir ki, konfransı giriş sözü ilə açan Qarabağ qaziləri birliyinin sədri Ehtimad Əsədov bir çox məqamlara toxunub:
“Bu layihənin əsas məqsədi Qarabağ əlillərinin, şəhid ailələrinin maarifləndirilmə yolu ilə problemlərinin həllinə yardım etməkdir. Biz onsuz də uzun illərdir bu qəbildən olan insanların probleminin həlli istiqamətində çalışırıq. Bu layihə gördüyümüz işlərin səmərəsini daha da artıracaqdır. Sözsüz ki, dövlət tərəfindən, xüsusi ilə Azərbaycan Respublikasının Prezidenti İlham Əliyev tərəfindən Qarabağ əlillərinə, şəhid ailələrinə diqqət və qayğı göstərilir, onların problemlərinin həllinə çalışırlar. Biz də bu işdə dövlətə, müvafiq dövlət strukturlarına kömək etməyə çalışırıq. Bizim bir sıra problemlərimiz var ki, onları dəqiqləşdirib konkret qurumlar qarşısında qaldırırıq. Bizi ən çox narahat edən problem bəzi məmurların özbaşınalığı, biganəliyidir. Necə olur ki, Prezident İlham Əliyev Qarabağ qazilərinə, şəhid ailələrinə, müharibə veteranlarına diqqət və qayğı göstərir, hamını onlara qarşı ədalətli olmağa çağırır, amma bəzi məmurlar buna məhəl qoymurlar. Bu qəbildən olan insanlara aid qanunlara, Prezident sərəncamlarına və fərmanlara hörmətsizlik edirlər.
Bir müddət əvvəl Azərbaycanda 1-ci Avropa Oyunları keçirildi. O oyunlarda da cənab Prezident Qarabağ qazilərinə diqqəti ilə yadda qaldı. Oyunların məşəlini son olaraq daşıyan və əsas məşəli yandıran da Qarabağ qazisi, ikiqat olimpiya çempionu İlham Zəkiyev oldu. Arabaçı TV-nin yaradıcısı və rəhbəri, oyunlarda könüllü kimi əlil arabasında çalışan 1-ci qrup Qarabağ qazisi İlham Məhərrəmovla şəkil çəkdirdi. Bu da Prezidentin həm dünyaya, həm də məmurlara, o cümlədən cəmiyyətə bir mesajıdır! Təəssüflər olsun ki, bütün dünya, hamı bu mesajı başa düşür, anlayır, amma bizim bəzi məmurlar yox…Uzun illər Əmək və Əhalinin Sosial Müdafiəsi Nazirliyi qayğıya ehtiyacı olan əlillərin üzün qapalı qaldı. Şükürlər olsun ki, Səlim Müslümov bu nazirliyə rəhbərlik etməyə başlayandan problem də həll olundu. Dəfələrlə cənab nazirlə görüşüb dərdimizi, problemlərimizi demişik. Bir çox problemlərimiz artıq həll olunub, amma həll olunmayanları da var.
Məsələn, 1998-cildə Qarabağ əlilinə “OKO” markalı avtomobil verilib. Amma artıq onların istismar müddəti başa çatıb, ona görə də çoxdan sıradan çıxıb. Düşünürük ki, heç olmasa 1-ci qrup çox ağır vəziyyətdə olan əlillərə yenidən avtomobillər verilməlidir. Belə insanlar elə də çox deyil, azdır. Bunu müvafiq qurumlar qarşısında qaldıracağıq. ümumiyyətlə, biz payızda bir sıra problemlərimizin həlli ilə bağlı Azərbaycan Milli Məclisinə də müraciət edəcəyik”.
Layihənin rəhbəri “Vətən Müharibəsi Əlilləri” birliyinin sədri Firudin Məmmədov da həm problemlərdən, həm də görülən işlərdən danışıb. O bildirib ki, Qarabağ əlillərinin, veteranlarının və şəhid ailələrinin öz hüquqlarını daha yaxşı bilməsinə böyük ehtiyac var. Bu məqsədlə Qarabağ əlillərinə və şəhid ailələrinə qanunla onlara şamil edilmiş güzəşt və imtiyazlarla bağlı Bakı şəhərində 3 konfrans keçiriləcək. O, layihə çərçivəsində hazırlanmış “Bunlar sizin hüquqlarınızdır!” adlı bukletin çap edildiyini də qeyd etdi. Buklet iştirakçılara paylandı.
Qaziler.az saytının baş redaktoru Rey Kərimoğlu çıxış edərək məlumat verib ki, Qaziler.az saytında layihə barədə banner qoyulub. Bu sayt layihəyə informasiya dəstəyi də verir. Eyni zamanda, saytda Qarabağ qazilərinə, şəhid ailələrinə və müharibə veteranlarına lazım olan bütün məlumatlar Qanunvericilik bazası şəkilində yerləşdirilib.
Tədbirdə Azərbaycanın Milli Qəhrəmanı “Fred Asif” Fondunun prezidenti Ədalət Məhərrəmov, tanınmış jurnalist, müharibə iştirakçısı Əlisəfa Mehdiyev və digər Qarabağ qaziləri çıxış edərək onları narahat edən problemlərdən danışıb və bunları həlli üçün konkret təkliflər səsləndiriblər. Bütün problemlər və təkliflər sonda müzakirə edilərək həlli istiqamətində addımlar atılması razılaşdırılıb.