Ağ Ev Türkiyənin Şəmdinli bölgəsində baş vermiş teraktı pisləyib.

ABŞ Milli Təhlükəsizlik Şurasının nümayəndəsi Ned Prays ölkəsinin PKK terror təşkilatının teraktlarına görə narahat olduğunu deyib.

“ABŞ Türkiyənin cənub-şərqində jandarm məntəqəsinə təşkil olunan və xeyli sayda insanın ölümünə səbəb olan hücumu pisləyir. Bu hücum PKK-nın dərin narahatlıq yaradan terrorlarından biridir. Terror PKK-nın Kürdüstan Azadlıq Şahinləri qanadı tərəfindən həyata keçirilib. Biz NATO müttəfiqimiz olan Türkiyəyə dəstəyimizi davam etdiririk və terrorla mübarizədə hər cür əməkdaşlığa hazırıq”, – deyə Ned Prays bildirib.

Qeyd edək ki, Türkiyənin Hakkari vilayətinin Şəmdinli mahalında PKK-çılar tərəfindən Durak jandarm məntəqəsinə bomba yüklənmiş avtomobillə hücum təşkil edilib. Terakt nəticəsində 10-u əsgər, 8-i mülki vətəndaş olmaqla, 18 nəfər həlak olub, 27-si yaralanıb.  (Axar.az)