XƏBƏR LENTİ

07 İyun 2020
06 İyun 2020

Digər Xəbərlər

08 İyun 2017 - 19:16

“Xəbər bizi çox kədərləndirdi…” –Oqtay Əsədovdan İranlı həmkarına məktub

Azərbaycan Respublikası Milli Məclisinin sədri Oqtay Əsədov Tehranda törədilmiş terror aktları ilə əlaqədar İran İslam Respublikası İslam Şurası Məclisinin sədri Əli Laricaniyə başsağlığı məktubu göndərib.

Strateq.az Milli Məclisə istinadən həmin məktubu təqdim edir:

“Tehranda törədilmiş terror aktları nəticəsində insan tələfatı və yaralananlar barədə xəbər bizi çox kədərləndirdi. Uzun illər ərzində erməni terrorundan əziyyət çəkən ölkə kimi Azərbaycanın Milli Məclisi olaraq biz Tehranda törədilmiş bu terror aktlarını qəti şəkildə pisləyirik. Bu qanlı cinayət hadisəsi bir daha göstərir ki, terrorçuluq bütün dünya üçün dəhşətli bir bəlaya çevrilib və biz parlamentarlar onun bütün təzahürlərinə qarşı birgə mübarizə aparmaq üçün səylərimizi əsirgəməməliyik".

Milli Məclisin sədri deputatların adından və şəxsən öz adından bu faciə ilə əlaqədar iranlı həmkarına, həlak olanların ailələrinə və yaxınlarına, bütün İran xalqına dərin hüznlə başsağlığı verib, yaralananlara və xəsarət alanlara şəfa diləyib.