XƏBƏR LENTİ

22 Oktyabr 2020

Digər Xəbərlər

06 İyul 2017 - 18:50

“Ermənistan sivil dünyaya, humanizm prinsiplərinə qarşı çıxdığını göstərdi” –Bəyanat

 

2017-ci il iyul ayının 4-də Ermənistan silahlı qüvvələrinin Azərbaycan Respublikasının Füzuli rayonunun Alxanlı kəndini minaatanlardan və qumbaraatanlardan atəşə tutması nəticəsində Allahverdiyeva Sahibə və onun 2 yaşlı qız nəvəsi Quliyeva Zəhranın həlak olması, digər mülki şəxs Quliyeva Səlminazın  ağır yaralanması ilə bağlı "Gənc Vətəndaş" Maarifləndirmə İctimai Birliyi bəyanat verib.

Bəyanatda qeyd edilir ki, BMT və digər beynəlxalq təşkilatlar tərəfindən Ermənistan silahlı qüvvələrinin mülki əhalinin öldürülməsi də daxil olmaqla mülki ilə hərbi hədəfləri fərqləndirməyən hücumları müharibə cinayətləri kimi qiymətləndirilməlidir:

"Bu hücuma və dinc sakinlərin həlak olmasına görə Ermənistan Respublikasının siyasi və hərbi rəhbərliyi bilavasitə məsuliyyət daşıyır. Azərbaycan Respublikasının Füzuli rayonunun Alxanlı kəndinin atəşə tutulması və dinc əhalinin qəsdən hədəfə götürülməsi Ermənistan Respublikasının Azərbaycanın mülki əhalisinə qarşı terror siyasəti yürütdüyünün növbəti sübutudur. Ermənistan Respublikası hərbi hədəflərlə mülki əhali arasinda fərq qoymadığını, Azərbaycana qarşı etnik təmizləmə siyasəti apardığını bir daha bütün dünyaya nümyiş etdirdi. Bununla da beynəlxalq konvensiya və sənədlərdə əksini tapan müharibə qanunlarını nümayişkarənə şəkildə pozduğunu və sivil dünyaya, humanizm prinsiplərinə qarşı çıxdığını göstərdi".

Bəyanatda, həmçinin  "Gənc Vətəndaş"  Maarifləndirmə İctimai Birliyi BMT və digər beynəlxalq təşkilatları, beynəlxalq gənclər təşkilatlarını Ermənistanın Azərbaycana qarşı 25 ildir ki, davam edən işğılçılıq siyasətinə, bu təcavüz nəticəsində ölkəmizin ərazisinin 20 faizinin işğal olunması, dinc sakinlərin məqsədli şəkildə öldürülməsinə münasibət bildirməyə çağırıb:  "Ermənistan ardıcıl olaraq 1992-ci ildə ratifikasiya etdiyi BMT-nin "Uşaq hüquqları haqqında" Konvensiyasını, "Müharibə zamanı mülki şəxslərin müdafiəsinə dair" IV Cenevrə Konvensiyasını, Birləşmiş Millətlər Təşkilatının “Ümumdünya İnsan Haqları Bəyannaməsi”ni, “Vətəndaş və siyasi hüquqlar haqqında” Beynəlxalq Paktı, "Genosid cinayətinin qarşısının alınması və cəzalandırılması haqqında" Konvensiyanı, “Fövqəladə vəziyyətlərdə və hərbi münaqişələr zamanı qadınların və uşaqların müdafiəsi” Bəyannaməsinin tələblərini kobud şəkildə pozmaqla hərbi cinayətlər törədir. "Gənc Vətəndaş"  Maarifləndirmə İctimai Birliyi BMT və digər beynəlxalq təşkilatları, beynəlxalq gənclər təşkilatlarını Ermənistanın hərbi cinayətlərə görə məsuliyyətə cəlb olunması, beynəlxalq birlik qarşısında cavab verməsi üçün zəruri tədbirlər görməyə çağırır. "Gənc Vətəndaş"  Maarifləndirmə İctimai Birliyi bəyan edir ki, Azərbaycan torpaqlarının 20 faizinin Ermənistanın işğalı altında qalması, 1 milyondan çox azərbaycanlının qaçqın və məcburi köçkünə çevrilməsi, ermənilər tərəfindən mütəmadi olaraq dinc sakinlərin öldürülməsi faktlarına, hərbi cinayətlərə və terror aktlarına göz yumulması BMT və digər beynəlxalq təşkilatlara inamı sarsıtmaqla, onların da məsuliyyətini gündəliyə gətirir. Bu isə ümumilikdə,  humanist dəyərlərə, dünyagörüşə zidd olmaqla,  dünyada radikalizm və ekstremizm ideloqlarını daha da ruhlandıra bilər".

Strateq.az