Siyəzən rayonunda baş verən etiraz aksiyası zamanı məktəbə bibər qazı atılması və şagirdlərin zəhərlənməsi barədə sosial şəbəkələrdə məlumat yayılıb.

Strateq.az xəbər verir ki, Daxili İşlər Nazirliyinin Mətbuat Xidmətinin rəis müavini Ehsan Zahidov Bizimyol.info-açıqlamasında faktı təkzib edib.

O bildirib ki, "Siyəzəndə razılaşdırılmamış aksiya keçirməyə cəhd göstərən bir qrup sakin öz aqressiv davranışları  ilə ətrafdakı  dinc  insanların  həyatı  üçün təhlükə  yaradıblar":

“Qanunçuluğu  və  ictimai asayişi  təmin edən polis əməkdaşları onların bu qanunsuz  hərəkətlərinin qarşısını alarkən həmin şəxslər polisə müqavimət göstərərək onlara daş və digər əşyalar atıblar. Qanun pozucularının atdığı daşlardan biri azyaşlını məktəbə aparan gənc xanıma dəyib və o ciddi xəsarət alaraq yerə yıxılıb. Dərhal iki polis əməkdaşı öz həyatlarını riskə qoyaraq  yaralı xanımı azğınlaşmış kütlənin ayaqları altından xilas edərək çağırdıqları təcili tibbi yardım maşını ilə xəstəxanaya çatdırıblar”.

Strateq.az