XƏBƏR LENTİ

08 Avqust 2020
07 Avqust 2020

Digər Xəbərlər

17 May 2015 - 08:06

Çağırışçıların və hərbi vəzifəlilərin hərbi qeydiyyat qaydası dəyişdi

Çağırışçıların və hərbi vəzifəlilərin hərbi qeydiyyat qaydası dəyişdirilib

Vətəndaşlığı olmayan şəxslər, sağlamlıq vəziyyətinə görə hərbi xidmətə yararsız hesab edilənlər, ağır və ya xüsusilə ağır cinayət törədənlər və qadınlar hərbi qeydiyyata götürülməyəcəklər

Nazirlər Kabineti “çağırışçıların və hərbi vəzifəlilərin hərbi qeydiyyatının aparılması Qaydası”nda dəyişikliklər edib.
APA-nın məlumatına görə, indiyə qədər bu Qayda “Hərbi vəzifə və hərbi xidmət haqqında” qanuna əsasən, həqiqi hərbi xidmətə çağırışın təmin edilməsi məqsədi ilə bütün çağırışçı və hərbi vəzifəli şəxslərin müəyyən olunmuş qaydada Azərbaycan Respublikası Səfərbərlik və Hərbi Xidmətə çağırış üzrə Dövlət Xidmətinin yerli idarə, şöbə və bölmələrində hərbi qeydiyyata alınmasını müəyyən edib.
Dəyişikliyə əsasən, bundan sonra bu qayda bu Qayda “Hərbi vəzifə və hərbi xidmət haqqında” qanuna əsasən, Azərbaycan Respublikasının Silahlı Qüvvələrini və Azərbaycan Respublikasının qanunvericiliyinə uyğun olaraq yaradılmış başqa silahlı birləşmələri şəxsi heyətlə komplektləşdirmək məqsədi ilə bütün çağırışçıların və hərbi vəzifəlilərin yaşayış yeri və ya olduğu yer üzrə Səfərbərlik və Hərbi Xidmətə çağırış üzrə Dövlət Xidmətinin yerli idarə, şöbə və bölmələrində hərbi qeydiyyata alınmasını müəyyən edəcək.
Eyni zamanda çağırışçılar və hərbi vəzifəlilər həqiqi hərbi xidmətə çağırıldıqda və ya könüllü daxil olduqda hərbi qeydiyyatdan çıxarılaraq xidmət etdiyi Müdafiə Nazirliyində, Daxili İşlər Nazirliyində, Ədliyyə Nazirliyində, Milli Təhlükəsizlik Nazirliyində, Fövqəladə Hallar Nazirliyində, Dövlət Sərhəd Xidmətində, Xüsusi Dövlət Mühafizə Xidmətində və Səfərbərlik və Hərbi Xidmətə çağırış üzrə Dövlət Xidmətində xüsusi qeydiyyata alınacaqlar.
Azərbaycan Respublikasının vətəndaşlığı olmayan şəxslər, sağlamlıq vəziyyətinə görə həm dinc dövrdə, həm də müharibə dövründə hərbi xidmətə yararsız hesab edilmiş, törədilmiş ağır və ya xüsusilə ağır cinayətə görə müəyyən müddətə azadlıqdan məhrum etmə və ya ömürlük azadlıqdan məhrum etmə növündə cəzaya məhkum edilmiş, ehtiyatda olmağın son yaş həddinə çatmış vətəndaşlar və qadın vətəndaşlar (hərbi-uçot ixtisasına malik olan, öz razılığı ilə hərbi qeydiyyata götürülən qadınlardan başqa) hərbi qeydiyyata götürülmürlər.